Արմինֆո.Շուրջ 1000 բեռնատարներ սպասում են «Վերին Լարս» անցակետով անցնելուն՝ ինչպես վրացական, այնպես էլ ռուսական կողմից: Այդ մասին ԱրմԻնֆո-ի թղթակցին հաղորդել է Ռուսաստանում Հայաստանի դեսպանության մաքսային կցորդ Վահան Հակոբյանը:
Ավելի վաղ սոցիալական ցանցերում և ֆորումներում օգտատերերը հաղորդել էին սահմանին բազմակիլոմետրանոց հերթերի մասին։ Այսօր ավելի վաղ Հյուսիսային Օսիայի ճանապարհային երթևեկության կազմակերպման կենտրոնի կայքում հաղորդվել էր, որ ավելի քան 3 հազար բեռնատարներ սպասում են ռուս-վրացական սահմանով անցնելու՝ "Վերին Լարս" անցակետում:
Մաքսային կցորդի հավաստմամբ՝ խցանումները պայմանավորված են մարդատար ավտոմեքենաների թվի զգալի աճով, որոնք այս օրերին հատում են Ռազմավիրական ճանապարհը: <Բայց այս պահին, կարելի է ասել, իրավիճակն արդեն կարգավորված է, և հերթերը գրեթե վերացել են>, - նշել է նա:
Ներկայում շուրջ 500 հայկական բեռնատարներ գտնվում են ՀՀ-ՌԴ ուղղությամբ, որոնց մի մասը Վրաստանի տարածքում է, իսկ մյուս մասն արդեն ձևակերպում է անցնում «Վերին Լարս» անցակետում: Նույնքան բեռնատարներ են սպասում հակառակ ուղղությամբ անցնելուն։
"Այս պահին երթևեկության սահմանափակումներ չկան, և հայկական բեռներն անարգել անցնում են մաքսային ձեւակերպում", - վստահեցրել է Վահան Հակոբյանը:
Ռազմավիրական ճանապարհը ներկայում միակ ցամաքային ճանապարհն է, որը կապում է Հայաստանը Ռուսաստանի հետ: Իսկ "Կազբեգ" - "Վերին Լարս" անցակետը Վրաստանի և Ռուսաստանի ցամաքային սահմանին գործող միակ անցակետն է։
