Արմինֆո.Չնայած "Արմենալ" փայլաթիթեղագլանման գործարանի վաճառքի շուրջ բանակցություններին՝ դրա մայր կառույցը՝ ռուսական "Ռուսալ" ընկերությունը, որոշել է փոխել հայկական դստեր տնօրենին։ Արթուր Զաքարյանին ընկերության գլխավոր տնօրենի պաշտոնում փոխարինել է Ռուսաստանից ուղարկված Մաքսիմ Կարամանովը։
Նշենք, որ ավելի վաղ լրատվամիջոցներում տեղեկություններ էին տարածվել այն մասին, որ Տաշիր ընկերությունների խումբը (սեփականատեր Սամվել Կարապետյան) դիտարկում է "ԱՐՄԵՆԱԼ" գործարանը ձեռք բերելու հնարավորությունը, որը "Ռուսալ" -ի նկատմամբ արեւմտյան պատժամիջոցների պատճառով արդեն մեկուկես տարի վնասով է աշխատում: ԶԼՄ-ներում տեղեկություններ են հայտնվել բանակցային գործընթացի մասին։ Սակայն ոչ Հայաստանի էկոնոմիկայի նախարար Գեւորգ Պապոյանը, ոչ "Տաշիրի" ներկայացուցիչները այդ հարցը դեռ չեն մեկնաբանում։
Մասնավորապես, հուլիսի սկզբին, ամփոփելով էկոնոմիկայի նախարարի պաշտոնում 100-օրյա գործունեության արդյունքները, Գեւորգ Պապոյանը հաղորդել է, որ արտադրության բարձր ծավալների դեպքում գործարանը որոշակի խնդիրներ ունի իրացման շուկաների առնչությամբ՝ հաշվի առնելով Ռուսաստանի եւ "Ռուսալ" ընկերության նկատմամբ արեւմտյան պատժամիջոցները: Առանց որևէ մանրամասներ բացահայտելու Պապոյանը նշել է, որ այժմ գործարար բանակցություններ են ընթանում, և ցանկացած մեկնաբանություն կարող է միայն խանգարել: "Բայց մենք անում ենք եւ անելու ենք հնարավորը, որպեսզի վաղը եւ հետագայում այնպիսի արդյունաբերական հզորություն եւ երկրի կարեւոր ակտիվ, ինչպիսին "Արմենալն" է, աշխատի մեր երկրում", - ընդգծել է Պապոյանը:
Անկախ դիտորդները, մինչդեռ, կարծում են, որ ձեռնարկության գլխավոր տնօրենի և կոմերցիոն տնօրենի փոփոխությունը ի զորու չէ ազդել «Արմենալի» ֆինանսական վիճակի վրա, քանի որ գոյություն ունեն անհաղթահարելի ուժի հանգամանքներ ՝ պատժամիջոցներ։ Ուստի, կարելի է ենթադրել, որ Մոսկվայից ուղարկված գործարանի նոր ղեկավարությունը, ամենայն հավանականությամբ, կզբաղվի այն վաճառքի նախապատրաստմամբ։
Վիճակագրական կոմիտեի տվյալների համաձայն, Հայաստանում ալյումինե փայլաթիթեղի արտադրության անկումը 2024թ. հունվար - մայիս ամիսներին կտրուկ արագացել է՝ 9,3%-ից մինչեւ 32%՝ կազմելով 8,271.1 հազար տոննա։
