ԱԶԲ-ն կհամաֆինանսավորի Սիսիան-Քաջարան ճանապարհահատվածի շինարարությունը

Արմինֆո. ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանն այսօր ընդունել է Ասիական զարգացման բանկի (ԱԶԲ) փաստահավաք առաքելության անդամներին՝ ԱԶԲ հայաստանյան մշտական առաքելության տնօրեն Դոն Լամբերտի գլխավորությամբ։ Հանդիպմանը մասնակցում էին նաև «Ճանապարհային դեպարտամենտ» հիմնադրամի ներկայացուցիչներ։

«Ճանապարհային դեպարտամենտ» հիմնադրամի հաղորդագրության համաձայն, ԱԶԲ փաստահավաք առաքելության նպատակն է քննարկել Հյուսիս-հարավի Սիսիան-Քաջարան ճանապարհի 27կմ երկարությամբ հյուսիսային ենթահատվածի կառուցման ծրագրին առնչվող հարցերի մանրամասները և նախապատրաստել ստորագրվելիք վարկային համաձայնագրի տեքստը։

«Նշենք‚ որ ԱԶԲ-ն ՀՀ կառավարության հետ համաֆինանսավորելու է Սիսիան-Քաջարան ճանապարհի հյուսիսային ենթահատվածի կառուցումը։

Հանդիպման ընթացքում ամփոփվել են փաստահավաք առաքելության աշխատանքների արդյունքները։ Մասնավորապես‚ շեշտվել է‚ որ Հյուսիս-հարավը կարևորագույն ենթակառուցվածքային ծրագիր է։ Քննարկվել են ծրագրի իրագործման ընթացքում բանկի‚ ՀՀ կառավարության‚ իրականացնող մարմնի համագործակցության մեխանիզմները‚ ծրագիրն իրականացնող կազմակերպության կարողությունների զարգացման հարցը։

Հատուկ անդրադարձ է եղել նշված ճանապարհահատվածում կառուցվելիք կամուրջների և թունելների անվտանգության համակարգերին‚ դրանց ստանդարտներին‚ սպասարկման առանձնահատկություններին‚ և նշվել է‚ որ այդ հարցերում պետք է ներգրավվեն նորագույն մեթոդները։

Քննարկման մասնակիցներն արծարծել են նաև ծրագրի ֆինանսական‚ գնման գործընթացներին‚ շրջակա միջավայրի պահպանությանը‚ սոցիալական ազդեցություններին առնչվող հարցեր», - ասվում հաղորդագրությունում։

Ինչպես ավելի վաղ ԱրմԻնֆո-ինհաղորդել են ՏԿԵ նախարարությունից, Հյուսիս-Հարավ ճանապարհային միջանցքի 4-րդ տրանշի Սիսիան-Քաջարան շուրջ 60 կմ երկարությամբ նոր ճանապարհահատվածի (ներառյալ Բարգուշատի թունելը) կառուցման աշխատանքները նախատեսվում է սկսել 2025 թվականին: Ճանապարհը կլինի երկրորդ տեխնիկական կատեգորիայի, կանցնի լեռնային բարդ ռելիեֆով և կներառի 27 կամուրջ ՝ 4,7 կմ ընդհանուր երկարությամբ, և 9 թունել ՝ 12,5 կմ ընդհանուր երկարությամբ (Բարգուշատի ամենաերկար թունելը ՝ մոտ 8,6 կմ երկարությամբ):

Աշխատանքները կիրականացվեն երեք ենթաբաժիններով՝ հյուսիսային հատված ՝ 27,12 կմ երկարությամբ, Բարգուշատի թունելի հատված ՝ 8,65 կմ երկարությամբ, և հարավային հատված ՝ 24,25 կմ երկարությամբ: Ընդհանուր առմամբ, ճանապարհահատվածի երեք ենթաբաժինների կառուցման համար կպահանջվի 708 մլն եվրո վարկային միջոցներ: Հարավային ենթաբաժինը նախատեսվում է իրականացնել ՎԶԵԲ և Եվրոպական ներդրումային բանկի (ԵՆԲ) համատեղ ֆինանսավորմամբ: ՎԶԵԲ - ի կողմից ներկայացված նախնական ծրագրի համաձայն, հարավային հատվածի ֆինանսավորման համար անհրաժեշտ վարկային միջոցները կազմում են 373 մլն եվրո, որից 236 մլն եվրոն նախատեսվում է ներգրավել ՎԶԵԲ-ից, իսկ մնացած 137 մլն եվրոն ՝ ԵՆԲ-ից:

Ըստ ֆինանսների նախարարության, Սիսիան-Քաջարան ճանապարհահատվածի (Հյուսիսային ենթաբաժին) շինարարությունը Հայաստանը նախատեսում է ֆինանսավորել ԱԶԲ-ի վարկով (236 մլն եվրո ստանալու պաշտոնական հայտ է ներկայացվել):

"Հյուսիս-Հարավը" անկախ Հայաստանի պատմության ամենամասշտաբային նախագծերից մեկն է։ Այդ ճանապարհը Իրանիսահմանից մինչեւ Վրաստանի հետ սահման  556 կմ տարածությունը կկրճատի մինչեւ 490 կմ։ Ճանապարհը էապես կհեշտացնի ելքը դեպի Սև ծով ոչ միայն Հայաստանի, այլև Իրանի համար։ Այսօրվա դրությամբ ներդրումային ծրագիրն իրականացվել է 10% - ով, իսկ ներգրավված վարկերի չափը 2024 թվականի մայիսի վերջի դրությամբ կազմել է 800,7 մլն դոլար: