Հինգշաբթի, 8 Օգոստոսի 2024 13:22

Արմինֆո. Համաշխարհային բանկի խմբի մեջ մտնող Վերակառուցման եւ զարգացման միջազգային բանկը Հայաստանին կտրամադրի 92,3 մլն եվրոյի վարկ, եւս 16 մլն դոլար դրամաշնորհի տեսքով կհատկացվի Արտոնյալ ֆինանսավորման գլոբալ հիմնադրամի (GCFF) կողմից: "ՀՀ կառավարության եւ ՎԶՄԲ-ի միջեւ համաձայնագիրը վավերացնելու մասին" օրենքի նախագիծը հավանության է արժանացել օգոստոսի 8-ին կառավարության նիստում:

Ինչպես նշվում է օրենքի նախագծի հիմնավորման մեջ, բյուջեի աջակցության միջոցներն ուղղվելու են պետբյուջեի պակասուրդի ֆինանսավորմանը: Վարկային միջոցների ժամանակին ստացումը մեծ նշանակություն ունի պետական բյուջեով նախատեսված ծախսերի ֆինանսավորման տեսանկյունից: Երկկողմ կարգով համաձայնեցված գործողությունների որոշակի միջոցառումների և բարեփոխումների իրականացումը պարտադիր պայման է բյուջետային աջակցության միջոցներ ստանալու համար: Ծրագրի շրջանակը, մասնավորապես, ներառում է կլիմայի փոփոխության հետևանքների մեղմմանն ու ադապտացմանը նպաստելը, ինչպես նաև շրջակա միջավայրի կառավարման նորմատիվային բազայի կատարելագործումը: Նախատեսվում է նաև միջոցառումներ իրականացնել հավասարության ամրապնդման և մարդկային կապիտալի զարգացման, կոռուպցիայի դեմ պայքարի և արդարադատության ոլորտի արդյունավետության բարձրացման ուղղությամբ: Միևնույն ժամանակ, Հայաստանի Հանրապետության և Վերակառուցման և զարգացման միջազգային բանկի միջև 2024 թվականի մայիսի 23-ին և 22-ին ստորագրված "Կանաչ, կայուն և ներառական զարգացման քաղաքականության երկրորդ գործառնություն>" ֆինանսավորման համաձայնագիրը լրացուցիչ ֆինանսական պարտավորություններ է ստեղծում Հայաստանի Հանրապետության պետական բյուջեի համար: