Հայաստանի ֆոնդային բորսան և Աբու Դաբիի ֆոնդային բորսան ստորագրել են փոխըմբռնման հուշագիր

Արմինֆո. Օգոստոսի 13-ին Հայաստանի ֆոնդային բորսայի (ՀՖԲ) գլխավոր տնօրեն Հայկ Եգանյանի և Աբու Դաբիի ֆոնդային բորսայի խմբի գլխավոր տնօրեն Աբդուլա Սալեմ Ալ Նուամիի միջև ստորագրվել է փոխըմբռնման հուշագիր, որը միտված է երկու բորսաների միջև փոխադարձ արդյունավետ համագործակցային հարաբերությունների հաստատմանը և ռազմավարական գործընկերության ամրապնդմանը։ Հուշագրի ստորագրմանը ներկա է գտնվել նաև Աբու Դաբիի ֆոնդային բորսայի գործառնական տնօրեն Սաքեր Ասլանը։

Հայաստանի ֆոնդային բորսայի հաղորդագրության համաձայն, ՀՖԲ-ն կարևորում է փորձի փոխանակման անհրաժեշտությունը և գործընկերային ծրագրերի իրականացումը, որոնք կծառայեն Հայաստանի կապիտալի շուկայի զարգացմանը, և հնարավորություն կստեղծեն գտնելու ուղիներ, որպեսզի երկկողմանի բացվեն շուկաները օտարերկրյա պոտենցիալ ներդրողների համար: Բորսաների նպատակն է ներդնել մասնագիտական փորձը և համատեղ ծրագրերի միջոցով նպաստել մրցունակ կապիտալի շուկայի ստեղծմանը:

Այս գործընկերության միջոցով Հայաստանը, և մասնավորապես, Հայաստանի ֆոնդային բորսան նպատակ ունեն դառնալ Մերձավոր Արևելքի և Եվրոպայի դինամիկ շուկաները կապող կարևոր կամուրջ՝ նպաստելով փոխշահավետ ֆինանսական ծրագրերի իրականացմանը։
Հատկանշական է, որ մայիսին Աբու Դաբիում AIM Congress ամենամյա ներդրումային համաժողովի շրջանակում Հայաստանի ֆոնդային բորսայի ներկայացուցիչները հրավիրված էին Աբու Դաբիի ֆոնդային բորսա, որտեղ ծանոթացել են բորսայի գործառույթներին, նոր առևտրային հարթակի հնարավորություններին և փոխանակվել փորձով։ Համաժողովին հետևել են երկու բորսաների մասնագետների միջև տարբեր քննարկումներ և փորձի փոխանակմանն ուղղված հանդիպումներ, որոնցով էլ հիմք է դրվել այսօրվա փոխըմբռնման հուշագրի ստորագրմանը։
Կողմերը լիահույս են, որ համագործակցության այս նոր շրջափուլը կստեղծի նոր հնարավորություններ և աճի նախապայմաններ երկու բորսաների համար՝ ամրապնդելով վերջիններիս դիրքերը որպես ֆինանսական շուկայում առանցքային խաղացողների:

Աբու Դաբիի ֆոնդային բորսան՝ADX-ը, արաբական տարածաշրջանի երկրորդ խոշոր արժեթղթերի շուկան է, որտեղ իրականացվում է բաժնետոմսերի, պետական և կորպորատիվ պարտատոմսերի և այլ ֆինանսական գործիքների առևտուր: ADX-ը հանդիսանում է տարածաշրջանի խոշորագույն հոլդինգային ընկերություններից մեկի՝ ADQ-ի մասը, որն ունի խոշոր ձեռնարկությունների լայն պորտֆել, որոնք ընդգրկում են Աբու Դաբիի դիվերսիֆիկացված տնտեսության հիմնական ոլորտները:

Հիշեցնենք, որ Հայաստանի ֆոնդային բորսան (ՀՖԲ) Հայաստանում գործող միակ ֆոնդային բորսան է, որը նաև Հայաստանի Կենտրոնական դեպոզիտարիայի միակ բաժնետերն է: AMX Group - ի առաքելությունն է նպաստել Հայաստանում բարենպաստ ներդրումային միջավայրի ձևավորմանը ՝ առաջարկելով արդյունավետ լուծումներ և ծառայություններ, այդ թվում ՝ արժեթղթերի առևտրի, քլիրինգի, հաշվարկների և կենսաթոշակային համակարգի կառավարման ոլորտներում: 2022 թվականի կեսերին Հայաստանի ֆոնդային բորսայի բաժնետոմսերի վերահսկիչ փաթեթը (65,03% կամ 967 բաժնետոմս) անցել է Վարշավայի ֆոնդային բորսային, ՀՀ Կենտրոնական բանկը պահպանել է բաժնետոմսերի 25,02% բաժնեմասը, իսկ մնացած 9,95% - ը Հայաստանի ֆոնդային բորսայի մասնաբաժինն է։ Մինչ Վարշավայի ֆոնդային բորսային ՀՖԲ-ի վաճառքի համաձայնությունը Կենտրոնական բանկին էր պատկանում Հայաստանի ֆոնդային բորսայի բաժնետոմսերի 90,05% - ը: Վարշավայի ֆոնդային բորսան (WFB), լինելով Կենտրոնական և Արևելյան Եվրոպայի խոշորագույն զարգացած շուկան, կազմակերպում է բաժնետոմսերի, պարտատոմսերի, հինադրամների փայերի և այլ գործիքների առևտուր: