Վրաստանի էկոնոմիկայի նախարարություն. "Սեւծովյան ստորջրյա մալուխ" նախագիծն արժանացել է միջազգային փորձագետների հավանությանը

Արմինֆո. Վրաստանի էկոնոմիկայի նախարարությունը հաղորդում է, որ միջազգային հետազոտությունը հեռանկարային է ճանաչել Սեւ ծովում ստորջրյա էներգետիկ մալուխի նախագիծը ("Սեւծովյան ստորջրյա մալուխ", Black Sea Energy Submarine Cable, BSSC): Ինչպես  հաղորդում է "Բիզնես Գրուզիա"-ն, փորձագետները նախապատրաստել են նաեւ նախագծի տեխնիկատնտեսական հիմնավորումը:

Հետազոտությունն իրականացրել է իտալական CESI խորհրդատվական ընկերությունը' "Վրացական պետական էլեկտրահամակարգ" պետական ընկերության պատվերով: Այն ֆինանսավորվել է Համաշխարհային բանկի կողմից՝ Վրաստանի էկոնոմիկայի և կայուն զարգացման նախարարության աջակցությամբ։ "Տեխնիկատնտեսական հիմնավորումը նախապատրաստվել է ծրագրի գործնական իրականացման հնարավորությունները և դրա իրականացման լավագույն ուղիները բացահայտելու համար ։ "Սևծովյան ստորջրյա մալուխի" նախագիծը նախատեսում է բարձրավոլտ ստորջրյա էլեկտրահաղորդման ցանցի ստեղծում, որը պետք է միացնի Վրաստանի և Եվրոպայի էներգահամակարգերը:

Նախագծի իրականացումը կամրապնդի Եվրոպայի և կովկասյան տարածաշրջանի էներգետիկ անվտանգությունը, կզարգացնի վերականգնվող էներգետիկայի հատվածը և կմեծացնի նշված տարածաշրջանների միջև տարանցման հնարավորությունները", - պարզաբանում են գերատեսչությունում ։

Էկոնոմիկայի նախարարությունը նաև նշում է, որ ուսումնասիրության շրջանակներում որոշվել են էներգամալուխի օպտիմալ հնարավորությունները, իրականացվել է օբյեկտի կառուցման արժեքի գնահատում և տնտեսական վերլուծություն:

Հիշեցնենք, որ ավելի վաղ ՀՀ էկոնոմիկայի նախարար Գևորգ Պապոյանը հաղորդել էր, որ Հայաստանում աշխատանքներ են տարվում համապատասխան ենթակառուցվածքների ստեղծման ուղղությամբ, որոնք կսպասարկեն առաջիկա գործընթացները տվյալ նախագծի շրջանակներում:

Ավելի վաղ "Հայաստանի էլեկտրական ցանցեր" ՓԲԸ տնօրենների խորհրդի նախագահ Կարեն Դարբինյանն ԱրմԻնֆո-ին հաղորդել էր, որ "Տաշիր" ընկերությունների խումբը սպասում է Վրաստանի կառավարության որոշմանը, որով Հայաստանը կմիանա դեպի Եվրոպական երկրներ էլեկտրաէներգիայի փոխադրման նախագծին: Նրա խոսքով, "Տաշիրը" մտադիր է Նոյեմբերյանի շրջանում կառուցել նոր ջերմաէլեկտրակայան՝ 126 ՄՎտ սահմանված հզորությամբ եւ ավելի քան 120 մլն դոլար արժողությամբ: Նախագիծը, ինչպես նշել է Դարբինյանը, ուղղված կլինի ինչպես Հայաստանում էլեկտրաէներգիայի պահանջմունքի բավարարմանը, այնպես էլ Վրաստան արտահանմանը: "Ներկայում մենք սպասում ենք Վրաստանի կառավարության համաձայնությանը ՝ մասնակցելու էլեկտրաէներգիայի փոխադրման նախագծին։ Խոսքը, մասնավորապես, Սեւ ծովի հատակով էլեկտրական մալուխ անցկացնելու մասին է ՝ Հարավային Կովկասից Ռումինիա եւ այնուհետեւ Հունգարիա էլեկտրաէներգիա մատակարարելու համար։ Կառավարության հավանությունն ստանալուց հետո կկնքվի համաձայնագիր, և կսկսվի էլեկտրակայանի կառուցման գործընթացը, որը կտևի երկու տարի", - ընդգծել էր ՓԲԸ տնօրենների խորհրդի նախագահը։