Բանտի սպառնալիք՝ և կավարտվի Հայաստանի տնտեսությունը. Վահրամ Միրաքյան

Արմինֆո. ՊԵԿ-ը նախաձեռնել է օրենսդրական առաջարկ, որով նախատեսում է Հայաստանում տարին մոտ հազար գործարարի բանտ նստեցնել: Այդ մասին ահազանգում է «Մանթաշյանց» գործարարների միության համահիմնադիր և նախագահ Վահրամ Միրաքյանը։

Ավելի վաղ ԱրմԻնֆո-ն հաղորդել էր, որ Պետական եկամուտների կոմիտեն առաջարկում է հրաժարվել քրեական պատասխանատվությունից ազատելու խրախուսական նորմերից: "Խրախուսական նորմերի առկայությունը նպաստում է հարկային հանցագործությունների կատարմանը, իսկ հանցագործությամբ պատճառված գույքային վնասի հատուցման միջոցով քրեական պատասխանատվությունից ազատումը ճանաչելու իրավական հիմքերը խոչընդոտում են և հնարավորություն չեն տալիս կանխել  հարկային նոր հանցագործությունների կատարումը", - նշել են նախաձեռնության հեղինակները: Օգոստոսի 8-ին օրինագիծը զետեղվել է իրավական ակտերի միասնական պորտալում, եւ օգոստոսի 14-ի կեսօրի դրությամբ հարցվածների 99 տոկոսը դեմ է արտահայտվել փաստաթղթին։

Միրաքյանի ասելով՝ նախաձեռնությունն առաջարկում է գործարարին բանտից բաց չթողնել, նույնիսկ, կանխատեսվող խախտման գումարը վճարելուց հետո: Ինչպես նշել է միության ղեկավարը, խոսքը Քրեական օրենսգրքի հոդվածի մասին է, ըստ որի, գործարարին կարող են 4-8 տարով կալանավորել 10 մլն դրամ եւ ավելի գումարի խախտման դեպքում:

«Այսինքն հարկային տեսուչները, եթե ենթադրում են, որ գործարարը 100 միլիոն դրամի հարկ չի վճարել, գործարարին բանտ են նստեցնում, գործարարը գումարը վճարում է, բայց շարունակում է մնալ բանտում: Հետո 3 տարի տևած դատերից պարզվում է, որ հարկային տեսուչները սխալվել են (այդպիսի շատ դեպքեր են լինում) գործարարին հետ են վճարում 100 միլիոնն ու բանտից ազատում են: Երեք տարի անց, արդեն բիզնես չկա, ո՞նց կարա բիզնես լինի, երբ հիմնադիրին 3 տարի բանտում եմ պահում: Սխալ «նախնական հարկային հաշվարկ» արած տեսուչի համար էլ օրենքը որևէ պատիժ չի նախատեսում: Կարճ ասած, եթե նախկինում կանխատեսվող խախտումի չափի վճարից հետո գործարարի կալանքը դադարեցվում էր, ապա հիմա չի դադարեցվելու ու գործարարին շարունակելու են բանտում պահել», - գրում է Միրաքյանը՝ «Ֆեյսբուքի» իր էջում:

Նրա ասելով՝ անցյալ տարի 290 հոդվածն օգտագործել են մոտ 1000 գործարարի դեմ, հետևաբար, եթե ՊԵԿ-ն առաջարկում է խախտումը վճարելուց հետո շարունակեն կալանավորած պահել գործարարին, նշանակում է, որ ՊԵԿ-ը պլանավորում է տարին մոտ 1000 գործարարի բանտ նստեցնել: 

Վահրամ Միրաքյանը վստահ է, որ չկա մի էդպիսի միջին կամ խոշոր բիզնես, որը 5 տարիների ընթացքում 10 միլիոն դրամի խախտում չունենա, «հնարավոր չէ այդքան ստիրիլ աշխատել»: «Հետևաբար, եթե տարին մոտ 1000 գործարարի բանտ նստեցնեն, մոտ 5 տարուց ՊԵԿ-ը բոլոր միջին ու խոշոր գործարաներին կբանտարկի ու վերջ, կավարտվի Հայաստանի տնտեսությունը, կավարտվի Հայաստանի Հանրապետությունը: Բայց դրա փոխարեն ՊԵԿը ստիրիլ աշխատանք արած կլինի: Հրաշալի է չէ՞:

Հիմա պատկրացրեցի՞ք, թե ինչքան աբսուրդ օրենսդրական առաջարկ է ներկայացրել ՊԵԿ-ը: Ես դեռ չեմ պատկերացնում, թե ոնց կարող է մարդու ուղեղում նման գաղափար առաջանա: Էս օրենսդրական առաջարկը ՊԵԿ-ի ադեկվատության/անադեկվատւթյան լավագույն ցուցիչն է: Այսպես լինում է, երբ չինովնիկն իր կաբինետից դուրս չի գալիս, ոլորտի հետ չի շփվում», - եզրափակել է "Մանթաշյանց" գործարարների միության նախագահ Վահրամ Միրաքյանը: