Առողջապահության տեսչական մարմինն ընթացիկ տարում 3 մլրդ դրամ տուգանք է նշանակել դեղերի շրջանառության ոլորտում խախտումների համար

Արմինֆո. ՀՀ առողջապահության և աշխատանքի տեսչական մարմինն ընթացիկ տարվա 8 ամիսների համար կազմել է շուրջ 3 մլրդ դրամի վարչական ակտեր՝ դեղերի շրջանառության ոլորտում խախտումների համար: Այդ մասին օգոստոսի 28-ին մամուլի ասուլիսի ժամանակ հայտարարել է ՀՀ առողջապահության և աշխատանքի տեսչական մարմնի ղեկավար Սլավիկ Սարգսյանը։

Այս ճյուղում ծանր պատկերն ավելի տեսանելի ներկայացնելու համար Սարգսյանը հրապարակել է 2023 թվականի խախտումների տվյալները։ Նրա խոսքով՝ նախորդ տարի ստուգող մարմինը տուգանքներ է գրել ընդամենը 500 միլիոն դրամի չափով։

"Հիմնական տուգանքները վերաբերում են դեղատոմսով բաց թողնման ենթակա դեղերի տրամադրմանն առանց դեղատոմսի, ժամկետանց դեղերի կամ չգրանցված դեղերի վաճառքին։ 2024 թվականի ընթացքում ժամկետանց դեղերի իրացման համար դուրս է գրվել 3,6 մլն դրամի տուգանք, 11 մլն՝ առանց դեղատոմսի վաճառքի, իսկ 2 մլրդ 900 մլն դրամ կազմում են չգրանցված կամ երկրի օրենսդրության խախտմամբ ներմուծված դեղերի համար տուգանքները", - պարզաբանել է տեսչական մարմնի ղեկավարը։

Նա նաև հավելել է, որ չգրանցված դեղերի օրենսդրության խախտմամբ երկիր ներմուծման համար տուգանքը կազմում է 1 միլիոն դրամ՝ մեկ անուն դեղի մինչև հինգ փաթեթի առկայության դեպքում, և 2 միլիոն դրամ ՝ 5 - ից ավելի անվանումների դեպքում:

"Ժամկետանց դեղերի իրացման համար տուգանքը կազմում է 100 000 դրամ, իսկ առանց դեղատոմսի դեղի դուրս գրումը՝ 5 000 դրամ", - պարզաբանել է Սարգսյանը:

Անդրադառնալով էլեկտրոնային դեղատոմսերով վաճառքի վերահսկողության մեխանիզմներին ՝ նա նշել է, որ անկախ այն հանգամաանքից, թե երբ է ստուգվելու օպերատորի մոտ, էլեկտրոնային դեղատոմսերով դուրս գրված դեղերի վաճառքի տվյալները պահպանվում են անորոշ ժամկետով, և խախտումների առկայությունը կդիտվի իրացման պահից սկսած, այսինքն ՝ 2024 թվականի մարտի 1-ից։

Խոսելով մարմնի կողմից իրականացվող ստուգումների մասին՝ նա նշել է, որ դրանք անցկացվում են կամ տարին մեկ, կամ 3 տարին մեկ, կամ 5 տարին մեկ՝ կախված այս կամ այն ռիսկային խմբում տնտեսվարողների առկայությունից. որքան բարձր է ռիսկերի խումբը, այնքան հաճախ է կատարվում ստուգումը: Ընդ որում, քաղաքացիների ահազանգերի վերաբերյալ ստուգումները կարող են իրականացվել անսահմանափակ քանակությամբ ։