Երեթշաբթի, 10 Սեպտեմբերի 2024 16:09

Արմինֆո. Հայաստանի խորհրդարանը սեպտեմբերի 10-ին հավանություն է տվել "ԵԱՏՄ մաքսային տարածքից արտահանվող ապրանքների ծագման որոշման ներդաշնակեցված համակարգի մասին" համաձայնագիրը վավերացնելու մասին " օրենքի նախագծին:

 

ԱԺ հաղորդագրության համաձայն, համաձայնագրի նպատակն է համակարգել եւ միավորել երրորդ երկրներ արտահանվող ապրանքների ծագման երկրի որոշման հետ կապված բոլոր հարցերը, կարգավորել ապրանքների ծագման հավաստագրեր տրամադրող կազմակերպությունների գործունեությունը, վերացնել նշված ոլորտում առկա իրավական բացերը:

 

ՀՀ էկոնոմիկայի նախարարի տեղակալ Նարեկ Տերյանի խոսքով փաստաթուղթը ստորագրվել է 2023 թվականի դեկտեմբերի 4-ին Մոսկվայում:

 

Համաձայնագրով սահմանվում են ԵԱՏՄ մաքսային տարածքից արտահանվող ապրանքների ծագումը որոշելու միասնական մոտեցումները: «Սա վերաբերում է նաեւ այն դեպքերին, երբ անդամ պետությունները երրորդ երկրների հետ առեւտրում միակողմանիորեն կիրառում են ոչ սակագնային կարգավորման միջոցներ»,- ընդգծել է Նարեկ Տերյանը: Ըստ նրա՝ փաստաթղթի դրույթները միտված են ներդաշնակեցնելու արտահանողների հետ փոխգործակցության եւ ապրանքների ծագման հավաստագրերի տրամադրման մասով անդամ պետությունների լիազորված կազմակերպությունների գործունեությունը, այդ թվում՝ հետագայում գործակցության էլեկտրոնային ձեւաչափի անցման միջոցով:

 

Ակնկալվում է, որ ապրանքների ծագման հավաստագրեր տվող կազմակերպությունների հետ փոխգործակցության միասնական մեխանիզմների մշակումը կդյուրացնի անդամ պետությունների արտահանողների մուտքը երրորդ երկրների շուկաներ:

 

Պատգամավոր Միքայել Թումասյանը հետաքրքրվել է, թե արդյոք համաձայնագրի վավերացմամբ կլուծվեն թանկարժեք մետաղներից պատրաստված զարդերի արտահանման ժամանակ այդ իրերի ծագման վկայականին առնչվող հարցերը: Դրական պատասխանելով հարցին՝ զեկուցողը հիշեցրել  է, որ կես տարի առաջ ստեղծվել է արտադրողների միասնական ռեեստր, որտեղ որպես արտադրող կարող են գրանցվել թանկարժեք մետաղներից իրեր արտադրող ընկերությունները: Եվ այդ հանգամանքն արտահանման ընթացքում կվկայի իրի՝ Հայաստանում արտադրված լինելու մասին:
 

Խորհրդարանականները հավանություն են տվել նաեւ «Եվրասիական տնտեսական միության շրջանակներում գյուղատնտեսական արտադրանքի պահեստային վկայագրերի թողարկման (տրման) շրջանառության եւ մարման կանոնների մասին» համաձայնագրի վավերացմանը:

 

Համաձայնագրի վավերացումը կնպաստի ԵԱՏՄ շրջանակում գյուղատնտեսական արտադրանքի պահեստային վկայագրերի օգտագործման փորձի ընդլայնմանը եւ դրանց կայուն շրջանառությանը՝ ապահովելով գյուղատնտեսական արտադրանքի շուկայի գործունեության թափանցիկությունը. նման կարծիք է հայտնել ՀՀ էկոնոմիկայի նախարարի տեղակալ Նարեկ Տերյանը:

 

Համաձայնագիրը ստորագրվել է 2023 թվականի հուլիսի 31-ին Մոսկվայում: Փաստաթղթով կանոնակարգվում են ԵԱՏՄ շրջանակում պահեստային վկայագրերի թողարկման շրջանառության եւ մարման հետ կապված իրավահարաբերությունները: Սահմանվում են պահեստային վկայագրերի նկատմամբ ներկայացվող պահանջները, գյուղատնտեսական արտադրանքի որակական ու քանակական հաշվառման առանձնահատկությունները եւ պահպանման կանոնները, կարգավորվում են պահեստի եւ գյուղատնտեսական արտադրանքի սեփականատիրոջ միջեւ հարաբերությունները, ապահովվում է պահեստային վկայագրերի եւ պահեստների վերաբերյալ տեղեկատվության հասանելիությունը:

 

ԱԺ տարածաշրջանային եւ եվրասիական ինտեգրման հարցերի մշտական հանձնաժողովի անդամ Շիրակ Թորոսյանը ներկայացրել է Արտաքին հարաբերությունների մշտական հանձնաժողովի դրական եզրակացությունը: