Հայաստանում կտուգանեն հարկային հաշվարկներում ոչ հավաստի տեղեկություններ ներառելու համար

Արմինֆո.Հայաստանում վարչական պատասխանատվություն կսահմանվի հարկային հաշվարկներում ոչ հավաստի, ոչ ճիշտ տեղեկություններ ներառելու համար։ Վարչական իրավախախտումների վերաբերյալ օրենսգրքում փոփոխություններ կատարելու մասին ՊԵԿ-ի նախաձեռնությունը երկրորդ եւ վերջնական ընթերցմամբ քննարկել է խորհրդարանը՝ սեպտեմբերի 11-ին:

Ինչպես հայտարարել է ՊԵԿ նախագահի տեղակալ Արթուր Մանուկյանը, գործող օրենսգրքով սահմանված են հարկային հաշվարկներ չներկայացնելու համար պատասխանատվության միջոցներ, սակայն պատասխանատվության միջոցներ սահմանված չեն այն դեպքերի համար, երբ հարկային հաշվարկներում պարունակվող տեղեկությունները սխալ և ոչ հավաստի են լրացված:

Ինչպես պարզաբանել է Մանուկյանը, խոսքը տեղեկատվության մասին է, որը կապված չէ այդ հարկի  հաշվարկման հետ, բայց շատ կարեւոր է, եւ կապված է ապագայում այդ հարկատեսակի գծով հարկի հաշվարկման եւ հարկային մարմնի կողմից իրականացվող ուսումնասիրությունների ու վերլուծությունների հետ:

Նախաձեռնության շրջանակում հստակեցվում է մաքսային և հարկային մարմինների կողմից ստուգման ենթակա վարչական իրավախախտումների վերաբերյալ գործերի շրջանակը: Մասնավորապես, առաջարկվում է նախազգուշացում սահմանել հարկային հաշվարկում առաջին անգամ ոչ հավաստի տեղեկատվություն ներառելիս։ Հետագայում' նախազգուշացում նշանակելու օրվանից հետո մեկ ամսվա ընթացքում խախտումը չվերացնելու դեպքում կսահմանվի տուգանք' նվազագույն աշխատավարձի տասնապատիկի չափով: Եվս մեկ ամիս անց տուգանքի չափը կհասնի նվազագույն աշխատավարձի հիսնապատիկի: Վարչական պատասխանատվություն չի առաջանում այն դեպքերում, երբ հարկ վճարողը ինքնուրույն ներկայացնում է շտկված հաշվարկները: