Ֆրանսիայի ԱԳ նախարարը ծանոթացել է Վեդիի ջրամբարի կառուցման ընթացքին

Արմինֆո.Ֆրանսիայի Եվրոպայի և արտաքին գործերի նախարար Ստեֆան Սեժուրնեն և ՀՀ ԱԳ նախարար Արարատ Միրզոյանն այցելել են Վեդիի ջրամբար, որը կառուցվում է Զարգացման ֆրանսիական գործակալության վարկային միջոցներով և ՀՀ կառավարության համաֆինանսավորմամբ։

Հայաստանի ԱԳՆ հաղորդագրության համաձայն, նախարարները ծանոթացել են ջրամբարի կառուցման աշխատանքների ընթացքին։ Ընդգծվել է ՀՀ դիմակայունության ամրապնդման համատեքստում ծրագրի ռազմավարական նշանակությունը:

ՀՀ ԱԳ նախարար Արարատ Միրզոյանը նշել է. «Հայաստանի և Ֆրանսիայի միջև գործընկերությունն ակտիվորեն զարգանում է բոլոր ուղղություններով, այստեղ մենք ականատեսն ենք դրա մեկ՝ շատ կոնկրետ, շոշափելի արդյունքի»:

Շրջայցի ժամանակ անդրադարձ է կատարվել ծրագրի՝ համայնքում տնտեսական զարգացման, լրացուցիչ ջրային ռեսուրսների ներգրավման ու ջրի կառավարման արդյունավետության բարձրացման, ոռոգելի հողատարածքների ջրամատակարարման բարելավման, ինչպես նաև շրջակա միջավայրի, զբոսաշրջության վրա զգալի դրական ազդեցությանը։

Հիշեցնենք, որ 2016 թվականի հունվարի 26-ին Վեդիի ջրամբարի կառուցման ֆինանսավորման նպատակով Զարգացման ֆրանսիական գործակալությունը Հայաստանի Հանրապետությանը հատկացրել է 75 մլն եվրո վարկ (ՀՀ կառավարության համաֆինանսավորումը՝ 15 մլն եվրո), որի շրջանակներում նախատեսվում է կառուցել 29,4 խմ ծավալով, 120 հա ջրային մակերեսով ջրամբար: Ջրի աղբյուր կդառնան Արարատի մարզի Վեդի և Խոսրով գետերը: Նշվել է, որ ծրագրի ամբողջական իրականացումը հնարավորություն կտա մեղմել Արարատյան դաշտի ջրի դեֆիցիտը, ինչպես նաև մեխանիկական ոռոգումից անցնել ինքնահոս համակարգի, ինչն էլ, իր հերթին, կհանգեցնի էլեկտրաէներգիայի խնայողության: Ծրագրի իրականացման արդյունքում Սևանա լճից ջրառը կկրճատվի 19 մլն խմ-ով, իսկ ոռոգելի հողատարածքների մակերեսը կավելանա մոտ 300 հա-ով: Ջրամբարի շահագործումից հետո կանջատվեն 11 պոմպակայաններ, ևս 3 - ը ՝ մասնակի, տարեկան կտրվածքով տնտեսումը կկազմի մոտ 1 մլրդ դրամ կամ 19 մլն կվտ/ժամ էլեկտրաէներգիա: Ներցանցային տնտեսությունների կորուստները կկրճատվեն 20-25 տոկոսով։ Ծրագիրն ի սկզբանե նախատեսվում էր ավարտել չորս տարվա ընթացքում:

Ջրամբարի կառուցումը Հայաստանի համար ռազմավարական կարևոր նշանակություն ունի ։ Թուրքիան ավելի վաղ հայտարարել էր Արաքսի վրա խոշոր ջրամբարներ կառուցելու իր ծրագրերի մասին, ինչը հայկական կողմի համար ռիսկեր է պարունակում ոռոգման ջրի դեֆիցիտի տեսքով: Հայաստանը չի կարող լիովին համահարթեցնել նման ռիսկերը, սակայն Վեդիի ջրամբարը թույլ կտա մեղմել թուրքական ջրային էքսպանսիայի հետեւանքները։

2021թ.մայիսի վերջի տվյալներով ծրագիրն իրականացվել է 71% - ով. կառուցվել է Վեդու ջրամբարի ոռոգման ջրանցքով սկսվող 36 կմ երկարությամբ խողովակաշար, որով ջուրը կհասնի 3220 հա ոռոգելի հողատարածքներին: Տարածքային կառավարման և ենթակառուցվածքների նախարարության փոխանցմամբ՝ մշակվել են 4000 հեկտար ներտնտեսային ոռոգման ցանցի վերակառուցման նախագծեր ։ Վեդի և Խոսրով գետերի վրա կառուցվել են ջրընդունիչ հանգույցներ, տեղադրվել է 10,5 կմ երկարությամբ խողովակաշար։ Նախագիծը պետք է ավարտվեր դեռևս 2022 թվականին, սակայն ժամկետները մի քանի անգամ հետաձգվել են ։