Հայկազ Ֆանյան. Վերջին 10 տարում 10 առաջատար ՏՏ սթարթափներ ներգրավել են շուրջ 490 մլն դոլար, հիմնականում՝ օտարերկրյա ներդրողներից

Արմինֆո. ՏՏ ոլորտը մեր տնտեսության լուսավոր կետերից է, և շատ ուրախալի է, որ աստիճանաբար outsourcing-ի բիզնես մոդելից անցում է կատարում սեփական product-ների մշակմանը՝ արժանանալով վենչուրային ներդրողների ուշադրությանը։ Այդ մասին «Ֆեյսբուքի» իր էջում գրել է Modex խորհրդատվական ընկերության տնօրեն Հայկազ Ֆանյանը։

«Վերջին 10 տարում միայն առաջատար 10-յակը ներգրավել է շուրջ 490 մլն դոլար՝ հիմնականում օտարերկրյա ներդրողներից։ Միևնույն ժամանակ ցավալի է, որ այս ընկերությունների ճնշող մեծամասնությունը գրանցված է այլ երկրներում և այդ ընկերություններում կատարված օտարերկրյա ներդրումները չեն հաշվառվում Հայաստանի հաշվին։

Հայաստանում հիմնադրված թոփ 10 թեք ստարտափները ըստ ֆինանսավորման մեծության

Վերջին 10 տարիներին Հայաստանում հիմնադրված ֆինանսավորման մեծությամբ թոփ 10 թեք ստարտափները ներգրավել են շուրջ 490 միլիոն դոլարի ներդրում, որի 39.8%-ը բաժին է հասնում Picsart-ին (195 միլիոն դոլար):

Այս 10 ստարտափներից միայն Picsart-ին և CodeSignal-ին է հաջողվել ֆինանսավորում ներգրավել C սերիայի շրջանակում, համապատասխանաբար 130 միլիոն և 50 միլիոն դոլար։

2024 թ-ին EasyDMARC-ը (20 միլիոն դոլար), Podcastle-ը (13.5 միլիոն դոլար) և ActiveLoop-ը (11 միլիոն դոլար, ներառված չէ ցանկում) միասին ներգրավել են 44.5 միլիոն դոլարի ներդրում։ Պատրաստվել է 3N Startups թեք բլոգի հետ համագործակցությամբ։

Հայաստանում հիմնադրված ասելով հասկանում ենք այն ստարտափները, որոնք առաջինը գրասենյակ բացել են Հայաստանում», - գրել է Ֆանյանը։

Նշենք, որ վիճակագրական տվյալների համաձայն, Հայաստանի ՏՀՏ ոլորտը 2023 թվականին ապահովել է 883.2 մլրդ դրամի հասույթ (ավելի քան 2.2 մլրդ դոլար), ինչը 54.8% - ով գերազանցում է մեկ տարվա վաղեմության ցուցանիշը ։ ՀՀ տեղեկատվական տեխնոլոգիաների ոլորտում աշխատում է 50 հազար մասնագետ։ ՏՀՏ-ում գերակշռող սեգմենտն ավանդաբար ծառայություններն են՝ 68.6% մասնաբաժնով (2022թ. - ի 77.7% - ի դիմաց) կամ 606.2 մլրդ դրամով՝ տարեկան 36.7% աճով ։ Ծառայությունների առյուծի բաժինը պատկանում է տեղեկատվական տեխնոլոգիաների (ՏՏ) ոլորտին՝ 449.1 մլրդ դրամ, ինչը 52.4% - ով բարձր է նախորդ տարվա ցուցանիշից ։ Հեռահաղորդակցության հատվածի ծառայությունների հասույթը կազմել է 148.3 միլիարդ դրամ՝ 5.5% տարեկան աճով: Ընդ որում, ՏՀՏ արտադրական հատվածի բաժինը տարվա ընթացքում նվազել է 0,5% - ից մինչև 0,1%, իսկ հասույթի ծավալը նվազել է 63,8% - ով ' մինչև 972.1 մլն դրամ:

Մինչդեռ, ս.թ. սեպտեմբերի կեսերին էկոնոմիկայի նախկին նախարար Վահան Քերոբյանը հաղորդել է երկրի ՏՏ ոլորտում լուրջ անկման մասին։ Նրա ասելով՝ այս տարվա առաջին կիսամյակում ճյուղը կրճատվել է մոտ 13 տոկոսով ։ Հիմնական պատճառը մեզ ընձեռված հնարավորությունները բաց թողնելն է, կարծում է Քերոբյանը։