ՀԾԿՀ-ին չի հետաքրքրում "Տաշիր" ընկերությունների խմբին էլցանցերը վաճառելու գործարքի գումարը

Արմինֆո. Հանրային ծառայությունները կարգավորող հանձնաժողովին (ՀԾԿՀ) չի հետաքրքրում "Հայաստանի էլեկտրական ցանցեր" ՓԲԸ-ն "Տաշիր" ընկերությունների խմբին վաճառելու գործարքի գումարը, քանի որ գումարը ներառված չէ էլեկտրաէներգիայի սակագնի մեջ: Այդ մասին սեպտեմբերի 20-ին սպառողների էլեկտրամատակարարման իրավիճակին նվիրված խորհրդարանական լսումների ժամանակ հայտարարել է ՀԾԿՀ նախագահ Գարեգին Բաղրամյանը ՝ պատասխանելով ԱԺ "Քաղաքացիական պայմանագիր" խմբակցության պատգամավոր Անդրանիկ Քոչարյանի հարցին։

Ինչպես նշել է Բաղրամյանը, ՀԾԿՀ-ում 2016 թվականին իրականացված գործարքն այդքան էլ սկզբունքորեն կարեւոր չեն համարում: Նա հիշեցրել է, որ 2006 թվին ռուսական "Ինտեր ՌԱՕ" ընկերությունը ցանցերի համար վճարել էր 60 մլն դոլարից մի փոքր ավելի: Այդ գումարը "նստել է" սպառողների սակագներում: Դրանից հետո 2016 թվականին ցանցերի սեփականությունն անցել է "Տաշիր" ԸԽ-ին, սակայն, որքան էլ վերջինս վճարած լինի գնման համար, նա չի կարող պետությունից պահանջել, որ այդ գումարը վերադարձվի էլեկտրաէներգիայի սակագնի հաշվին: Այդ պատճառով,  ինչպես նշել է Բաղրամյանը, պետության համար սկզբունքային հետաքրքրություն չեն ներկայացնում գործարքների գումարները, ինչը չի կարելի ասել գործարքների մասնակիցների եւ հենց բաժնետերերի մասին, որոնց մասին տվյալները պարզում է ոչ միայն ՀԾԿՀ-ն, այլեւ Ազգային անվտանգության ծառայությունը: Նույն մոտեցումը, ինչպես նշել է Բաղրամյանը, կիրառվում է ոչ միայն "էլեկտրացանցերի", այլ նաեւ էներգահամակարգի համակարգաստեղծ մյուս օբյեկտների նկատմամբ։

Նշենք, որ վերջին շրջանում Հայաստանի իշխանական շրջանակներում ավելի հաճախ են հնչում էլեկտրացանցերի ազգայնացման կոչեր։ Որպես պատճառ նշվում են էլեկտրաէներգիայի հաճախակի անջատումները։ Ավելի վաղ մամուլի ասուլիսում "Տաշիր" ընկերությունների խմբի տնօրենների խորհրդի նախագահ, "Հայաստանի էլեկտրական ցանցեր" ՓԲԸ տնօրենների խորհրդի նախագահ Կարեն Դարբինյանը նշել էր, որ ընկերությունը կարևոր, բայց ոչ միակ կառույցն է էլեկտրաէներգիայի հաճախակի անջատումների հարցում: Որպես օրինակ նա բերել էր թատերական բեմադրության, ֆուտբոլային խաղի ժամանակ լույսերն անջատվելու, Հայկական ԱԷԿ-ի աշխատանքի ավտոմատ դադարեցման, Երևանի ՀԷԿ-ում բռնկված հրդեհի դեպքերը: Կատարված ուսումնասիրությունները ցույց են տվել, որ ընկերությունը որևէ առնչություն չունի այդ բոլոր դեպքերի հետ ։