Հայաստանի տնտեսության աճի բարձր տեմպեր ապահովող գործոնները, գործնականում, լիովին չեզոքացվել են.  «Լույս» հիմնադրամ

Արմինֆո. Հայաստանի տնտեսության աճի բարձր տեմպեր ապահովող գործոնները, գործնականում, լիովին չեզոքացված են։ Այդ մասին ասվում է "Լույս" հիմնադրամի հաղորդագրությունում, որի փորձագետները վերլուծել են ՀՀ տնտեսության սոցիալ-տնտեսական զարգացումը 2024 թվականի հունվար-օգոստոսին։

Հիմնադրամում նշել են, որ, ինչպես եւ սպասվում էր, երկրում տնտեսական ակտիվության աճի տեմպերն աստիճանաբար դանդաղում են, ինչը ոչ պակաս չափով առնչվում է ոսկերչական արտադրանքի վերաարտահանման նվազմանը: Արդյունքում, ինչպես կանխատեսում են հիմնադրամի փորձագետները, մինչև տարեվերջ տնտեսական աճի դանդաղումը կխորանա, հատկապես, արտադրության և առևտրի ոլորտներում: Օգոստոսին տնտեսական ակտիվության ցուցանիշը կազմել է 5,6 տոկոս՝ հուլիսի համեմատ դանդաղելով 0,6 տոկոսային կետով։ Տնտեսական ակտիվության ինդեքսը հունվար-օգոստոսին նույնպես դանդաղել է մինչև 9,0 տոկոս՝ հունվար-հուլիսի համեմատ դանդաղելով 0,6 տոկոսային կետով։

Մտահոգություն են հարուցում նաև արտահանման ցուցանիշները։ Առանց ոսկերչական գործունեությունը հաշվի առնելու՝ արտահանման ընդհանուր անկումը հունվար-հուլիսին կազմել է 12,1 տոկոս ։ "Սա խիստ մտահոգիչ է, քանի որ բացի հանքային ըմպելիքներից և բուսական արտադրանքից, այլ ուղղություններով արտահանման ծավալները բացասական կամ գրեթե զրոյական ներդրում ունեն արտահանման ընդհանուր ծավալի աճի գործում ՝ դրանով իսկ արտացոլելով Հայաստանի տնտեսության մրցունակությանն առնչվող իրավիճակը", - ասվում է հիմնադրամի հաղորդագրությունում:

Վարկավորման աճի կառուցվածքը դեռևս մտահոգիչ է։ 2024 թվականի օգոստոսին հիփոթեքային և սպառողական վարկավորման աճի տեմպերն արագացել են առանց այն էլ բարձր մակարդակներից։ Վարկերի այդ տեսակներն ուղղվում են այն տնային տնտեսություններին, որոնց եկամուտները պատշաճ կերպով չեն աճում, ինչը միջնաժամկետ հեռանկարում կարող է հանգեցնել ֆինանսական համակարգի էական խնդիրների: Միեւնույն ժամանակ, արդյունաբերության վարկավորման աճն օգոստոսին դրական թրենդի մեջ է մտել բացառապես հանքարդյունաբերության ոլորտի ձեռնարկություններին տրված վարկերի հաշվին: Արդյունաբերության մյուս հատվածներում վարկավորումը բավականին ցածր մակարդակում է, իսկ արտադրական հատվածին տրամադրված վարկերի ծավալները շարունակում են նվազել։