Արմինֆո.Հոկտեմբերի 4-ին Impact Hub Yerevan-ի հարկի տակ տեղի ունեցավ Social Impact Award Armenia 2024-ի երկար սպասված մրցանակաբաշխության միջոցառումը։ Ծրագրի ինկուբացիոն փուլի գործընկերներն այս տարի IDBank և Idram ընկերություններն են՝ ի դեմս «Մի դրամի ուժը» նախագծի։
Երիտասարդ սոցիալական ձեռներեցներին աջակցող ամենամյա հեղինակավոր այս նախաձեռնությունը արդեն 6-րդ տարին է՝ բացահայտում է հայ երիտասարդների լավագույն բիզնես գաղափարները՝ ստեղծելով լայն հնարավորություններ դրանք հղկելու, զարգացնելու և կայացած բիզնես ծրագրի վերածելու համար։
Այս տարվա ծրագրին դիմած շուրջ 30 հայտերից ընտրված 10 լավագույն գաղափարների հեղինակները, անցնելով ինկուբացիոն փուլը, ձեռք բերեցին գործիքներ, մենթորություն և ռեսուրսներ, որոնք անհրաժեշտ կլինեն իրենց բիզնես գաղափարները բարելավելու և նշանակալի ազդեցության հասնելու համար:
IDBank-ի եւ Idram-ի հաղորդակցության եւ ՍՊ ծրագրերի վարչության ղեկավար Տաթեւիկ Վարդեւանյանը նշում է․ «Կրթություն տալով երիտասարդներին՝ մենք կարողանում ենք լուծել սոցիալական տարբեր խնդիրներ, և սոցիալական ձեռներեցության զարգացումն այս առումով հրաշալի գաղափար է մեր երկրի համար։ Հուսով ենք՝ Idram-ի և IDBank-ի կողմից SIA Armenia 2024-ի ինկուբացիոն փուլին ցուցաբերված աջակցությունը լավագույն ազդեցությունը կունենա ծրագրին մասնակցած երիտասարդների հետագա գործունեության վրա և այս ամիսների ընթացքում ձեռք բերված կարևոր ու հիմնարար գիտելիքները կծառայեն ներկայացված հրաշալի բիզնես գաղափարների իրականացմանը»։
«Շատ ուրախ ենք, որ ինկուբացիոն ծրագրի իրականացման համար մեզ միացավ «Մի դրամի ուժը» և մենք կարողացանք լավագույն մասնագետներին հրավիրելով և մեր երիտասարդներին ավելի շատ ռեսուրսներ հատկացնելով՝ ավելի շատ հմտություններ տալ նրանց, որպեսզի իրենց գաղափարները կյանքի կոչեն»,- նշում է Impact Hub Yerevan-ի գործադիր տնօրեն Գեւորգ Պողոսյանը։
Ժյուրիի որոշմամբ՝ հաղթողների եռյակը կազմեցին «ElectRoads», «Աստղագիտությունը բոլորի համար» և «Retyre Design» թիմերը։ Չորրորդ հաղթողը՝ «Hydroponic greenhouses»-ը՝ ընտրվել է համացանցում անցկացված Համայնքային քվեարկության արդյունքներով։
Հաղթող 4 թիմերը ստացան 1500 եվրոյին համարժեք մրցանակ և բացառիկ հրավեր՝ մասնակցելու նոյեմբերի 26-30-ը Գերմանիայում կայանալիք Social Impact Award-ի ամենամյա գագաթնաժողովին։ Այս փուլը ևս կիրականացվի IDBank-ի ֆինանսավորմամբ։
Հիշեցնենք, որ «Մի դրամի ուժը» նախաձեռնությունը SIA Armenia 2024 ծրագրի իրականացմանն ուղղել էր 4,165,643 դրամ։
