Արմինֆո. "Սոցիալական աջակցության մասին" օրենքի նախագծի և հարակից օրենքների փաթեթի ընդունումից հետո անհրաժեշտություն կառաջանա երկու տարվա ընթացքում մշակել և հաստատել 50 նորմատիվ ակտ: Այդ մասին հոկտեմբերի 10-ին մամուլի ասուլիսի ժամանակ հայտարարել է ՀՀ աշխատանքի և սոցիալական հարցերի նախարարի տեղակալ Աննա Ժամակոչյանը։
Նրա խոսքով՝ երկարատև քննարկումներից հետո փաթեթն առաջին ընթերցմամբ ընդունվել է Ազգային ժողովի կողմից, սակայն դրա լիարժեք կիրառման համար ժամանակ կպահանջվի: Փաթեթի ամենագլխավոր ուղերձը սոցիալական աջակցության նոր համակարգի ներդրումն է։ Նոր օրենքի առաջին արդյունքները շոշափելի չեն լինի դրա կիրառման առաջին փուլում, բայց տեսանելի կլինեն բարեփոխումների գործընթացի ավարտից հետո: Նախարարի տեղակալը տեղեկացրել է, որ Հայաստանում նախատեսվում է ներդնել սոցիալական ծառայությունների միասնական ինտեգրված համակարգ, որը պետք է հիմնված լինի սոցիալական կարիքների գնահատման միասնական համակարգի վրա: Նոր փոփոխություններով նախատեսվում է նախարարությանը կից բժշկասոցիալական փորձաքննության 38 գործակալությունների, ինչպես նաև սոցիալական զբաղվածության պետական գործակալությունների, սոցիալական աջակցության տարածքային գործակալությունների և տեղական ենթակայության սոցիալական աջակցության 17 բաժինների հիման վրա ստեղծել նոր կառույց ՝ Համալիր սոցիալական ծառայությունների պետական վարչություն:
Բացի այդ, նախատեսվում է, որ մինչև օրենքով սահմանված մրցույթների անցկացումը նոր ծառայությունում պաշտոնները տրամադրվեն ժամանակավոր աշխատանքային պայմանագրերի կնքման հիման վրա: Օրենսդրական նախաձեռնության կողմից առաջարկվող նման կառուցվածքային փոփոխությունը, կառավարության կարծիքով, թույլ կտա ապահովել ընտանիքների և քաղաքացիների սոցիալական կարիքների գնահատման համալիր և արդյունավետ համակարգի ներդրումը: Այս փոփոխությունները զգալի ներդրում կունենան սոցիալական ծառայությունների համալիր կենտրոնների աշխատանքի բարելավման, դրանց կառուցվածքային կառավարման մոդելի անխափան աշխատանքի և լրամշակման գործում:
