Ամերիաբանկն իր գործունեության տարիներին ավելի քան 500 մլրդ դրամ է ուղղել ՓՄՁ հատվածի ֆինանսավորմանը

Արմինֆո.  Ամերիաբանկն իր գործունեության տարիներն, ընդհանուր առմամբ, ավելի քան 500 մլրդ դրամ է ուղղել ՓՄՁ հատվածի ֆինանսավորմանը: Այդ մասին հայտարարել է Ամերիաբանկի տնօրինության նախագահ, գլխավոր տնօրեն Արտակ Հանեսյանը՝ հոկտեմբերի 16-ին "Իմ Ամերիա, իմ Հայաստան" նախագծի շրջանակում Բանկի երեք արշավների մեկնարկին նվիրված մամուլի ասուլիսի ժամանակ:

Նա ներկայացրել է նաև մի շարք այլ ցուցանիշներ, որոնց Ամերիաբանկին հաջողվել է հասնել իր գործունեության տարիների ընթացքում: Մասնավորապես, Հանեսյանի հավաստմամբ, այս տարիների ընթացքում բանկը միջազգային ֆինանսական կազմակերպություններից ավելի քան 1 մլրդ դոլար է ներգրավել Հայաստանի տնտեսության վարկավորման համար:

Նրա ասելով՝ վերջին 10 տարիների ընթացքում Ամերիաբանկն առաջատար դիրքեր է զբաղեցնում վարկային պորտֆելի ծավալով, որը ս.թ. սեպտեմբերի 30-ի դրությամբ կազմել է 1.13 տրլն դրամ:  Վերջին 5 տարիների ընթացքում Ամերիաբանկը հանդիսանում է Հայաստանի ամենախոշոր հարկատուներից մեկը' պետական գանձարան փոխանցելով 58 մլրդ դրամի հարկեր:

Բացի այդ, իր գործունեության տարիներին, ինչպես նշել է գլխավոր տնօրենը, Ամերիաբանկը միջազգային հեղինակավոր կազմակերպություններից ստացել է ավելի քան 100 պարգեւ, որոնցից 30-ը' "Հայաստանի լավագույն բանկ" անվանակարգում: Միայն այս տարի արդեն ստացվել է ավելի քան 10 մրցանակ, որոնցից երկուսը Euromoney-ի և Global Finance-ի կողմից՝ "Հայաստանի լավագույն բանկ" անվանակարգում:

"Մենք շատ ուրախ ենք, որ մեր գրանցած յուրաքանչյուր ձեռքբերում իր արձագանքն է գտնում Հայաստանի տնտեսության տարբեր ոլորտներում և մեր երկրում բնակվող քաղաքացիների կյանքում", - նշել է Արտակ Հանեսյանը:

ԱրմԻնֆո ԼԸ կողմից պատրաստված Հայաստանի բանկերի ֆինանսական վարկանիշի 30.06.2024 թ. տվյալներով Ամերիաբանկը պահպանում է առաջատարությունը վարկավորման ծավալով՝ 2.9 մլրդ դոլար: Ընդ որում, բանկը պահպանում է առաջատարի դիրքը կորպորատիվ վարկավորման գծով (1.8 մլրդ դոլար, տարեկան աճը ՝ 39%), ինչի հետ մեկտեղ հաջողվել է ամրագրել առաջին հորիզոնականը նաև մանրածախ վարկավորման գծով (1.02 մլրդ դոլար, տարեկան աճը՝ 27%): Մասնավորապես, բանկը շարունակում է առաջատար մնալ տնտեսության այնպիսի ճյուղերի վարկավորման գծով, ինչպիսիք են արդյունաբերական հատվածը, ագրոհատվածը, շինարարության ոլորտը, առևտրի ոլորտը, տրանսպորտի և կապի ոլորտը ՝ ամրապնդվելով նաև սպառողական վարկավորման և հիփոթեքային վարկերի գծով 1-ին հորիզոնականում:

Ամերիաբանկն ակտիվների (3.95 մլրդ դոլար), ընդհանուր կապիտալի (576.1 մլն դոլար), ընդհանուր պարտավորությունների (3.4 մլրդ դոլար) ծավալով ամրապնդվել է 2-րդ հորիզոնականում: Ակտիվները տարեկան կտրվածքով ավելացել են 22.3%-ով, ընդհանուր կապիտալը՝ 27%-ով, ընդհանուր պարտավորությունները՝ 21.6%-ով:

Բանկն իր համար ապահովել է ժամկետային ավանդների գծով առաջատարությունը (989.9 մլն), զբաղեցնելով 2-րդ հորիզոնականը ցպահանջ պարտավորությունների գծով (1.5 մլրդ դոլար)՝ վերջին երկու տարվա ընթացքում երկու ցուցանիշներն էլ ավելացնելով 44%-ով։ Ընդհանուր առմամբ, ֆիզիկական անձանց (ժամկետային և ցպահանջ) ավանդների գծով Ամերիաբանկը պահպանում է 2-րդ հորիզոնականը'  1.3 մլրդ դոլար' վերջին 4 տարիների ընթացքում այդ ցուցանիշն ավելացնելով գրեթե 2 անգամ:

Ամերիաբանկը պահպանում է առաջատար դիիրքը սեփական պարտատոմսերի տեղաբաշխումից ներգրավված միջոցների ծավալով' 385.3 մլն դոլար՝ տարեկան 55% աճով:

Առաջին կիսամյակի արդյունքներով Բանկն ապահովել է 70.3 մլն  դոլարի զուտ շահույթ (պահպանվում է 2-րդ դիրքը)' տարեկան կտրվածքով այն ավելացնելով 26%-ով, իսկ վերջին 4 տարում' գրեթե 6 անգամ:

Նշենք, որ 2024թ. փետրվարին Bank of Georgia Group PLC (BOGG) - ը հայտարարել է Հայաստանի առաջատար "Ամերիաբանկ" ՓԲԸ ձեռք բերելու համաձայնության մասին։ Գործարքի գինը կկազմի շուրջ 303.6 մլն դոլար: Գործարքը փակվել է, վրացական բանկը դարձել է Ամերիաբանկի բաժնետոմսերի 90% - ի սեփականատերը, 10% - ը պահպանել է Վերակառուցման և զարգացման եվրոպական բանկը (EBRD): Գործարքն ամբողջությամբ ֆինանսավորվել է Խմբի ավելցուկային կապիտալի հաշվին։ Ձեռքբերման գինը կազմում է ակտիվների 0,65 x զուտ արժեքը՝ 2023 թվականի հոկտեմբերի 31-ի դրությամբ, և շահույթի 2,6 x մինչև 2023 թվականը: ՀՀ կենտրոնական բանկը 2024թ. մարտի 29-ին նախնական համաձայնություն է տվել Bank of Georgia Group PLC (BOGG) և JSC Bank of Georgia բանկերի կողմից "Ամերիաբանկ" ՓԲԸ կանոնադրական կապիտալում զգալի մասնակցության ձեռք բերմանը: BOGG Group-ը միջազգային ֆինանսական ընկերություն է, որը գրանցված է Միացյալ Թագավորությունում: Խմբի բաժնետերերի թվում են աշխարհի խոշորագույն ֆինանսական կազմակերպությունները, այդ թվում՝ JP Morgan-ը, BlackRock-ը (ԱՄՆ), Vanguard Group-ը (ԱՄՆ), Schroders-ը (UK), Norges Bank Investment Management-ը (Նորվեգիա) և այլն:

Հիշեցնենք, որ մինչ այդ գործարքը, 2024թ. հունվարի 1-ի դրությամբ Ամերիաբանկի բաժնետերերն էին "Իմաստ Գրուպ" (Սի - Ուայ) Լիմիթեդը (նախկին անվանումը՝ Ամերիա Գրուպ (Սի-Ուայ) Լիմիթեդ)՝ 48,82% բաժնեմասով, EBRD-ը՝ 17,71%, Ասիական զարգացման բանկը (ԱԶԲ)՝ 13,92%, ESPS Holding Limited - ը ՝ 12,05% և Afeyan Foundation for Armenia Inc.՝ 7,5%.