ՀՀ կառավարությանը "Լիդիան Արմենիա"-ի բաժնետոմսերի 12.5%-ի նվիրատվության շուրջ պայմանագրի կնքումը հետաձգվում է

Արմինֆո. "Լիդիան Արմենիա" ընկերության 100% բաժնետոմսերի 12.5% - ի նվիրատվության շուրջ պայմանագրի կնքումը հետաձգվում է մինչև ս.թ. դեկտեմբերի 30-ը: Այդ մասին որոշումն ընդունվել է ՀՀ կառավարության հոկտեմբերի 24-ի նիստում։

Որոշման նախագծի հիմնավորման համաձայն, ի սկզբանե նախատեսվում էր պայմանագիրը կնքել մինչև 2024 թվականի նոյեմբերի 1-ը, սակայն, առաջացած տեխնիկական խնդիրների պատճառով այդ ժամկետները հետաձգվել են։

Հիշեցնենք, որ ս.թ. հունվարի 18-ին Հայաստանի կառավարությունը հաստատել էր Ամուլսարի հանքը շահագործող «Լիդիան Արմենիա» ընկերության բաժնետոմսերի  12,5 տոկոսը որպես նվիրատվություն ընդունելու մասին որոշումը։

2023 թվականի փետրվարի 22-ին ՀՀ կառավարությունը, «Լիդիան Արմենիա» ՓԲԸ-ն և Եվրասիական զարգացման բանկը ստորագրել են փոխըմբռնման հուշագիր, ինչը նշանավորել է Ամուլսարի հանքավայրի շահագործման ծրագրի վերագործարկումը։ Նշվում էր, որ հուշագրի շրջանակում կներգրավվի 150 մլն դոլար, որից 100 մլն դոլարը' ԵԱԶԲ-ի վարկային միջոցներ, 50 մլն դոլարը կապահովվի տեղական բանկի կողմից, և պայմանագրից դուրս լրացուցիչ 100 մլն դոլար կներդրվի բաժնետերերի կողմից: ՀՀ էկոնոմիկայի այն ժամանակվա նախարար Վահան Քերոբյանը հուշագրի ստորագրումից հետո հայտարարել էր, որ Ամուլսարի հանքի շահագործումը պետական գանձարանին կապահովի տարեկան 30-40 մլրդ դրամի մուտքեր, հանքի գործարկմամբ Վայոց ձորի մարզում կբացվի շուրջ 1000 նոր աշխատատեղ: Գործարքի շրջանակում Հայաստանի կառավարությունը կստանա ընկերության բաժնետոմսերի 12,5 տոկոսը, որի դիմաց ոչինչ չի վճարի, բայց դրա փոխարեն գործարքը որոշակի ռիսկերից կապահովագրի:

Ավելի վաղ, մինչ շահառուների փոխվելը, «Լիդիան Արմենիա»-ն հանդիսանում էր բրիտանական օֆշորային «Լիդիան Ինթերնեշնլ»-ի դուստր ընկերություն, որը բաժնետոմսեր է տեղաբաշխել Թորնթոյի ֆոնդային բորսայում: Այնուհետեւ ընկերությունն անցել է ապացուցակման կարգ: Վերակառուցվածքավորման արդյունքում ընկերության բաժնետոմսերի ողջ փաթեթն անցել է կանադա-ամերիկյան նորաստեղծ "Լիդիան Կանադա վենչուրս"-ին, որի շահառուներն ամերիկյան Orion Mine Finance և կանադական Osisko Gold Royalties ընկերություններն են: Ամուլսարի նախագծի ընդհանուր արժեքը կազմում է 370 մլն դոլար: Հանքավայրի շահագործման ժամկետը 10 տարի 4 ամիս է, ընդ որում, տարեկան կտրվածքով նախատեսվում է արդյունահանել միջինը 200 հազար ունցիա ոսկի:

Հանքավայրը Հայաստանում երկրորդն է պաշարների մեծությամբ ։ Ընկերության տեղեկատվության համաձայն, հանքավայրը պարունակում է շուրջ 73733 կգ ոսկի՝ 1 տոննայում  0,78 գ  միջին պարունակությամբ, ինչպես նաև՝ 294.367 տոննա արծաթ՝ 1 տոննայում 9.29 գ  միջին պարունակությամբ: Այն գտնվում է Ջերմուկ քաղաքից 13 կմ հեռավորության վրա, Արփա և Որոտան գետերի միջեւ։