Չի լինի համընդհանուր բժշկական ապահովագրություն, չի լինի ԵՄ-ի հետ վիզային ռեժիմի ազատականացում. տեղեկատվություն մտորումների համար՝ ՀՀ ԱԺ հանձնաժողովի նախագահից

Արմինֆո. Համընդհանուր բժշկական ապահովագրության (ՀԲԱ) առկայությունը մուտքի արտոնագրերի ազատականացման շուրջ ԵՄ - Հայաստան երկխոսության ավարտի պայմաններից մեկն է: Սա՝ որպես տեղեկատվություն։ Չի լինի ՀԲԱ, չի լինի Եվրամիության հետ վիզային ռեժիմի ազատականացում։ Այդ մասին նոյեմբերի 5-ին հայտարարել է ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանը՝ խորհրդարանում ՀՀ արտաքին քաղաքական գերատեսչության 2025 թվականի բյուջեն ներկայացնելիս։

Նշենք, որ նոյեմբերի 1-ին ՀՀ ֆինանսների նախարար Վահե Հովհաննիսյանը պարզաբանել էր, որ ՀԲԱ-ի ներդրումը հերթական անգամ հետաձգվում է, բայց այս անգամ՝ անորոշ ժամկետով,  հավելելով, որ հաջորդ տարվա բյուջեի նախագծում համապատասխան ծախսային հոդված չկա: Մինչդեռ, 2024 թվականի պետական բյուջեով ս. թ. հուլիսից համակարգի ներդրման համար նախատեսվում էր հատկացնել 18 մլրդ դրամ։ Սակայն, չնայած հուլիսի սկզբին Համաշխարհային բանկը հայտարարեց, որ պատրաստ է 110 մլն դոլար վարկ տրամադրել ՀՀ-ին՝ "առողջապահական ծառայությունների համընդհանուր ծածկույթի ապահովում"  ծրագրին աջակցելու համար, ՀԲԱ ներդրումը հետաձգվել էր մինչև 2025 թվականի հունվար։ Ինչպես հայտարարել են Առողջապահության նախարարությունում, իրավական ակտի ընդունման ժամկետների ձգձգումը, հիմնականում, կապված է շահառուների առաջին խմբի ապահովագրավճարներն ամբողջությամբ սուբսիդավորելու պետական գանձարանի «կարողությունը» որոշելու հետ:

<Մենք հատկապես կարևորում ենք այս հարցը (ՀԲԱ ներդրումը): Կարծում եմ, որ այն օդում կախված է, այստեղ կարևոր է Ֆինանսների նախարարության դերը, բայց վաղ թե ուշ ստիպված ենք լինելու վերադառնալ դրան", - այսօր խորհրդարանում հայտարարել է փոխարտգործնախարար Պարույր Հովհաննիսյանը: Նա նաև վստահություն է հայտնել, որ, այնուամենայնիվ, կգտնվեն համապատասխան ֆինանսական ռեսուրսներ պարտադիր բժշկական ապահովագրության համակարգի ներդրման համար:

<Պարոն Հովհաննիսյան, այս հարցի վերաբերյալ ասելիք ունե՞ք> , - ֆինանսների նախարար Վահե Հովհաննիսյանից հետաքրքրվել է Արման Եղոյանը։

<Ըստ էության, ամեն ինչ ասված է. առաջնորդվելու ենք մեր հնարավորություններով>, - նշել է ՀՀ գլխավոր ֆինանսիստը:

Հիշեցնենք, որ 2024 թվականի հուլիսի 17-ին Եվրոպական խորհուրդը հաստատել է Հայաստանի հետ վիզային ռեժիմի ազատականացման շուրջ երկխոսություն սկսելու Եվրահանձնաժողովի առաջարկը ։ Թե որքան կտևեն այդ բանակցությունները, փորձագետները դժվարանում են ասել։ Եվրահանձնաժողովում արդեն ս.թ. հուլիսի 22-ին հայտարարել են, որ երկխոսության մեկնարկը կաջակցի Հայաստանին ԵՄ-ի հետ առանց վիզայի ռեժիմի հասնելու իր երկարաժամկետ նպատակին հասնելու համար: "Երկխոսությունը կհանգեցնի բարեփոխումների կարևոր ոլորտներում, ներառյալ՝ ճամփորդական փաստաթղթերի անվտանգությունը, սահմանային վերահսկողությունը, միգրացիան և ապաստանը, հասարակական կարգը, արտաքին կապերը և հիմնարար իրավունքները Հայաստանում: Հանձնաժողովը ուշադիր հետեւելու է այդ ոլորտներում առաջընթացին՝ Եվրոպական խորհրդարանի եւ խորհրդի հետ սերտ համագործակցությամբ: Երկխոսությունը կանցկացվի Վիզային ռեժիմի ազատականացման գործողությունների ծրագրի շրջանակում, որը կներկայացվի Հայաստանի իշխանություններին խորհրդում քննարկումից հետո: Վիզային ռեժիմի ազատականացումն ավտոմատ գործընթաց չէ եւ կդիտարկվի միայն այն դեպքում, եթե երկխոսությունը հաջողությամբ ավարտվի եւ կատարվեն Վիզային ռեժիմի ազատականացման գործողությունների ծրագրում նշված բոլոր պայմանները",- նշել են Եվրահանձնաժողովում, հավելելով, որ դրա հաջող ավարտի դեպքում Հայաստանի քաղաքացիների համար ավելի հեշտ եւ էժան կլինի մեկնել Եվրոպա կարճ ժամկետով (ցանկացած 180 օրվա ընթացքում 90 օրից պակաս):