Հայաստանում մեկ շնչին բաժին ընկնող պարտքի բեռը շարունակում է աճել. արդեն հասել է 4.1 հազար դոլարի սահմանագծին

Արմինֆո. Հայաստանում մեկ շնչի հաշվով պարտքի տեսակարար բեռը 2024 թվականի հոկտեմբերին ավելացել է մինչև 4.1 հազար դոլար (մեկ տարի առաջվա 3.8 հազար դոլարից)։ Ընդ որում, արտաքին պարտքից մեկ շնչի հաշվով պարտքի բեռը մեկ տարվա ընթացքում փոքր-ինչ նվազել է՝ 2.2 հազար դոլարից հասնելով 2.1 հազար դոլարի, մինչդեռ, ներքին պարտքից շարունակել է աճել՝ 1.6 հազար դոլարից հասնելով 2 հազար դոլարի։

Դա դիտվել է մինչև 2024թ.հոկտեմբերի 1-ը Հայաստանի բնակչության թվի տարեկան կտրվածքով 3,8% - ով կամ 112,7 հազար մարդով ՝ մինչև 3,067 մլն մարդ ավելանալու ֆոնին՝ պետական պարտքի 10,4% - ով կամ 1,2 մլրդ դոլարով աճի պայմաններում: Բնակչության թվի նման աճը, հիմնականում, պայմանավորված է եղել 2023թ. սեպտեմբերին Արցախի  Հայաստան բռնի տեղահանված քաղաքացիներով, և միայն ավելի փոքր չափով ՌԴ-ից տեղափոխված եւ այստեղ հաստատած ռելոկանտներով, քան բնակչության բնական աճով:

 Արտաքին պարտքի ոսկեարժութային պահուստներով ծածկման աստիճանը 2024թ. հոկտեմբերի 1-ի դրությամբ նվազել է մինչև 56,8%՝ նախորդ տարվա 64%-ից՝ ինչպես արտաքին պարտքի 3,4%, այնպես էլ պահուստների 14,2% տարեկան անկման ֆոնին։ Համեմատության համար նշենք, որ մեկ տարի առաջ այս օրվա դրությամբ և արտաքին պարտքն ու պահուստները, համապատասխանաբար, 6% և 11,4% աճ էին գրանցել։

ՀՀ վիճակագրական կոմիտեի տվյալներով՝ Հայաստանի պետական պարտքը 2024թ. հոկտեմբերի 1-ի դրությամբ գերազանցել է 12.5 մլրդ դոլարը (ավելի քան 4.8 տրլն դրամ)՝ տարեկան աճի 14%-ից մինչեւ 10.4% դանդաղմամբ։ Դա պայմանավորված է արտաքին պարտքի անկմամբ՝ ներքին պարտքի շարունակական աճի պայմաններում։ Մասնավորապես, արտաքին պարտքի դինամիկան  6% աճից շարժընթաց է ծավալել դեպի 3,4% անկում, իսկ ներքին պարտքի աճն արագացել է 27%-ից մինչև 29,1%, ինչի արդյունքում դրանց բացարձակ մեծությունը կազմել է, համապատասխանաբար, 6.296 մլրդ դոլար (2.439 տրլն դրամ) և 6.206 մլրդ դոլար (2.404 տրլն դրամ)։