Փաշինյանի մոտ քննարկել են Հայաստանի ագրոապահովագրության ոլորտի խնդիրները

Արմինֆո.Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել են գյուղատնտեսության ապահովագրության ոլորտին վերաբերող հարցեր:

Կառավարության հաղորդագրության համաձայն, ոլորտի պատասխանատուները ներկայացրել են առկա խնդիրները, գյուղապահովագրության շարունակականության ապահովման մարտահրավերները, առաջարկել դրանց ուղղված լուծումներ: Մասնավորապես, ընդգծվել է վնասի գնահատման նոր ստանդարտների ներդրման, ոլորտի փորձագետների վերապատրաստման ու որակավորման կարևորությունը։ Զարգացած գյուղապահովագրության համակարգ ունենալու համատեքստում կարևորվել է նաև վիճակագրական ենթակառուցվածքների ներդրման անհրաժեշտությունը, համակարգի նկատմամբ վստահության ապահովումը:

Ամփոփելով խորհրդակցությունը՝ վարչապետ Փաշինյանը կարևորել է ոլորտի զարգացմանն ուղղված կոնկրետ և արդյունավետ աշխատանքների իրականացումը: Վարչապետի խոսքով՝ միանշանակ է, որ ապահովագրության համակարգը պետք է խթանի գյուղատնտեսության զարգացումը: Երկրի ղեկավարը մեկ անգամ ևս ընդգծել է, որ որոշում կայացնողները ոլորտն արդյունավետ կառավարելու համար պետք է անմիջական շփում ունենան շահառուների հետ, խնդիրներին ծանոթանան տեղերում:

Վարչապետը հանձնարարել է բարձրացված հարցերի ուղղությամբ իրականացնել հետևողական աշխատանքներ՝ հաշվի առնելով խորհրդակցության ընթացքում ներկայացված խնդիրներն ու առաջարկությունները:

Ավելի վաղ ԱրմԻնֆո-ն հաղորդել էր, որ գյուղատնտեսության ապահովագրության ոլորտում խնդիրներ են ծագել KfW-ի կողմից ագրոապահովագրության համակարգի ներդրման պետական ծրագրին մասնակցող ապահովագրական ընկերությանը 5,5 մլն դրամի դրաամաշնորհային մասի չվճարման պատճառով,  քանի որ, KfW-ի ներկայացրած նամակի համաձայն, ծրագրին մասնակցող ապահովագրական ընկերության նկատմամբ պատժամիջոցներ են գործում: Այդ առնչությամբ Էկոնոմիկայի նախարարությունն առաջարկել է նշված 5,5 մլն դրամը ապահովագրական ընկերությանը վճարել միայն 2024 թվականի համար՝ ՀՀ պետական բյուջեի հաշվին։

Հիշեցնենք, որ 2024 թվականին ՀՀ ագրոապահովագրության շուկայից վերաապահովագրական ընկերության  հեռանալու պատճառով ապահովագրական ընկերությունները չեն կարողացել ողջ ծավալով ստանձնել ապահովագրական ռիսկերը ՝ հաշվի առնելով կլիմայի փոփոխության հետևանքով առաջացած բարձր վնասները ։ Ինչպես ԱրմԻնֆո-ն հաղորդել էր 2023 թվականի սկզբին, ագրոապահովագրության գծով աշխատում է ընդամենը 3 ընկերություն՝ ԻՆԳՈ Արմենիա, Ռոսգոսստրախ Արմենիա և Սիլ Ինշուրանս, նշելով, որ փաստացի երկրում ագրոապահովագրության ծրագիրը ժամանակավորապես դադարեցվել է՝ ծրագրի արտասահմանյան դոնորների դիրքորոշման առնչությամբ։

Այդ իսկ պատճառով ծրագիրը ս.թ. ուշ է սկսվել, ինչի առնչությամբ անհրաժեշտ էր ժամանակավոր լուծում գտնել 2024 թվականի համար և փոխել ծրագրի մոտեցումը։ 2024 գյուղատնտեսական տարվա պիլոտային ծրագրի իրականացումն ապահովելու նպատակով կառավարությունը որոշում է ընդունել ոչ միայն սուբսիդավորել ապահովագրավճարները, այլև փոխհատուցել ապահովագրական ընկերությունների ծախսերը ՝ ապահովագրավճարների որոշակի շեմը գերազանցելու դեպքում։