ԿԶԵՀ-ը Հայաստանին 200 մլն դոլարի վարկ կտրամադրի Քաջարանի թունելի կառուցման համար

Արմինֆո. Եվրասիական զարգացման բանկը Կայունացման և զարգացման եվրասիական հիմնադրամի (ԿԶԵՀ) միջոցներից Հայաստանին 200 մլն դոլարի վարկ կտրամադրի Քաջարանի թունելի կառուցման համար: Ազգային ժողովի դեկտեմբերի 3-ի լիագումար նիստում քննարկումներ են ընթանում բանկի հետ վավերացման ներկայացված համաձայնագրի շուրջ:

Տարածքային կառավարման և ենթակառուցվածքների նախարարի տեղակալ Քրիստինե Ղալեչյանի խոսքով ՝ նախագիծը նախատեսվում է իրականացնել "Հյուսիս-Հարավ" ճանապարհային միջանցքի ներդրումային ծրագրի շրջանակում: Փաստաթուղթը ստորագրվել է 2024 թվականի հուլիսի 26-ին։

Նախագծի համաձայն,  նախատեսվում է կառուցել մոտ 7 կմ երկարությամբ թունել և արդիականացնել Մ2 Երևան-Երասխ-Գորիս-Մեղրի- Իրանի սահման ճանապարհի մոտ 4 կմ երկարությամբ հատվածը (Քաջարանի թունելի մուտքը Սիսիան - Քաջարան նախատեսվող նոր ճանապարհահատվածի հատումն է):

Նախագծի կարիքների համար նախատեսվում է մոտ 160 հողամասերի օտարում: Աշխատանքների իրականացման մոտավոր ժամկետը կկազմի շուրջ 6 տարի: Նախատեսվող շինարարական աշխատանքների մոտավոր արժեքը (ներառյալ ԱԱՀ) կազմում է 144,6 մլրդ դրամ (կամ մոտ 369 մլն ԱՄՆ դոլար):

Նախատեսվում է, որ նախագծի իրականացման արդյունքում գոյություն ունեցող երթուղին կկրճատվի 14 կմ-ով, տրանսպորտային միջոցների միջին արագությունը կհասնի 80 կմ/ժ-ի, իսկ Քաջարան-Ագարակ ճանապարհի երթուղին կկրճատվի մոտ 40 րոպեով: Ըստ վարկի պայմանների՝ տոկոսադրույքը սահմանվում է տարեկան 4%, մարման ժամկետը' 20 տարի, որից 5-ը' արտոնյալ ժամանակահատված: