Հայաստանի խորհրդարանը վավերացրել է ԿԶԵՀ-ին ինքնուրույն միջազգային կազմակերպության կարգավիճակ տալու մասին արձանագրությունը

Արմինֆո. Հայաստանի Ազգային ժողովը դեկտեմբերի 4-ի լիագումար նիստում վավերացրել է Կայունացման և զարգացման եվրասիական հիմնադրամին (ԿԶԵՀ) ինքնուրույն միջազգային կազմակերպության կարգավիճակ տալու մասին արձանագրությունը:

Հիշեցնենք, որ ԿԶԵՀ-ի ստեղծման մասին համաձայնագիրը ստորագրվել էր 2009թ. հունիսի 9-ին, երբ Հայաստանի, Բելառուսի, Ղազախստանի, Ղրղզստանի, Ռուսաստանի և Տաջիկստանի կառավարությունների ղեկավարները ստորագրեցին 8,513 մլրդ դոլար ծավալով Եվրասիական տնտեսական ընկերակցության հակաճգնաժամային հիմնադրամի ստեղծման մասին պայմանագիրը, որը հետագայում վերածվեց ԿԶԵՀ-ի: Հաշվի առնելով այն հանգամանքը, որ հիմնադրամն ինքնուրույն կառույց չէր (դրա միջոցները կառավարում էր Եվրասիական զարգացման բանկը), որոշում է կայացվել հիմնադրամն ինքնուրույն կառույցի վերածելու մասին:

ԿԶԵՀ-ն ստեղծվել է բացասական ճգնաժամային հետևանքների հաղթահարման, երկարաժամկետ կայունության ապահովման և հիմնադրամի մասնակից պետությունների տնտեսությունների ինտեգրմանը նպաստելու նպատակով: Այն մասնակից պետություններին տրամադրում է ֆինանսական վարկեր ՝ մասնակից պետությունների բյուջեներին եւ (կամ) վճարային հաշվեկշիռներին աջակցելու համար, ներդրումային վարկեր՝ մասնակից պետություններին կամ ընկերություններին, դրամաշնորհներ ՝ սոցիալական ոլորտում պետական ծրագրերի ֆինանսավորման համար։

Ներկայում հիմնադրամի կանոնադրական կապիտալում ներդրումների ընդհանուր ծավալը կազմում է 8,513 մլրդ դոլար, որից 1 մլն դոլար բաժին է ընկնում Հայաստանին, 10 մլն դոլար' Բելառուսին, 1 մլրդ դոլար' Ղազախստանին, 1 մլն դոլար'  Տաջիկստանին, 7,5 մլրդ դոլար' Ռուսաստանին, և 1 մլն դոլար' Ղրղզստանին: Այս պահի դրությամբ Հայաստանում ԿԶԵՀ վարկային պորտֆելը կազմում է 840 մլն դոլար, որից 540 մլն դոլարը գտնվում է ակտիվ իրացման փուլում: