Հայաստանի արտարժույթի միջբանկային շուկայում դեկտեմբերի առաջին շաբաթվա ընթացքում աճել են թե դոլարով, թե ռուբլով գործարքները

Արմինֆո.Հայաստանի արտարժույթի միջբանկային շուկայում դեկտեմբերի 2-6-ը միայն մեկ անգամ իրականացվել են դոլարով, եւ երեք անգամ՝ ռուբլով գործարքներ, իսկ չորեքշաբթի եւ հինգշաբթի օրերին հարթակը դատարկ է եղել: Եվրոյով գործարքներ արդեն մեկ ամսից ավելի չեն իրականացվում։ Այնուամենայնիվ, չնայած որոշակի պասիվությանը, շաբաթվա վերջում դոլարային գործարքների միտումը  46,3% անկումից հասել է 53% աճի, ինչը նկատվել է ռուբլով գործարքներում, որոնց միտումը 60,5% անկումից շրջադարձ է կատարել դեպի 2,6 անգամ աճի: Արդյունքում՝ ռուբլով գործարքները սկսել են գերակշռել, բայց դրանց շաբաթական ծավալը շատ չի գերազանցել դոլարային գործարքների շաբաթական ծավալը:

Դրան զուգընթաց, արտարժույթի ներբանկային շուկայում հաշվետու շաբաթվա ընթացքում (02-06.12.24-ը ' 25-29.11.24-ի համեմատ) դոլարի առքի միտումը զգալի աճ է գրանցել վաճառքի անկման արագացման հետ մեկտեղ, եվրոյի առքուվաճառքի միտումը շրջադարձ է կատարել դեպի անկում, ինչը նկատվել է նաև ռուբլով գործարքների դեպքում, որոնց միտումը նույնպես ուղղվել է դեպի անկում։

Արդյունքում՝ ս. թ. դեկտեմբերի 2-6-ը դրամը շաբաթվա սկզբին շարունակելով թուլանալ դոլարի և եվրոյի նկատմամբ,  հինգշաբթի օրվանից սկսել է ամրապնդվել, համապատասխանաբար, ԱՄՆ դոլարի նկատմամբ  403,5-ից մինչև 396 դրամ /1 դոլար, և եվրոյի նկատմամբ՝ 425-ից մինչև 420,5 դրամ / 1 եվրո, իսկ ռուբլու նկատմամբ սկսել է թուլանալ ՝ 3,78-ից մինչև 3,93 դրամ/1 ռուբլի։ Մեկ տարի առաջ  դեկտեմբերի 6 - ին, դրամի փոխարժեքը դոլարի նկատմամբ կազմել է 404 դրամ/1դոլար, եվրոյի նկատմամբ՝ 436,5 դրամ/1եվրո, ռուբլու նկատմամբ՝ 4,33 դրամ/1ռուբլի, ինչը ներկայիս փոխարժեքների համեմատ վկայում է դրամի տարեկան արժևորման մասին՝ և դոլարի, և եվրոյի, և ռուբլու նկատմամբ։