Գևորգ Պապոյանը եւ «Ցե-Կվադրատ Ամպեգա»-ի ներկայացուցիչները քննարկել են Հայաստանի կապիտալի շուկայի և ֆինանսական էկոհամակարգի զարգացումը

Արմինֆո. Էկոնոմիկայի նախարար Գևորգ Պապոյանը դեկտեմբերի 19-ին ընդունել է «Ցե-Կվադրատ Ամպեգա» կենսաթոշակային ֆոնդի փոխնախագահ Անդրեաս Վիմմերին և խորհրդի անդամ Կառլոս Մենդես դե Վիգոյին։ Հանդիպմանը ներկա է եղել նաև նախարարի տեղակալ Սևակ Միքայելյանը։

«Ցե-Կվադրատ Ամպեգան» ավելի քան 10 տարի է կառավարում է կենսաթոշակային և ներդրումային ֆոնդեր Հայաստանում: Ընկերությունը ծառայություններ է մատուցում կուտակային կենսաթոշակային համակարգի մասնակիցներին, ինստիտուցիոնալ և մասնավոր ներդրողներին:

Էկոնոմիկայի նախարարության հաղորդագրության համաձայն, հանդիպման ընթացքում քննարկվել են Հայաստանի ֆինանսական շուկայի և ներդրումային միջավայրի զարգացմանն առնչվող մի շարք հարցեր։

Կողմերն անդրադարձել են «Ցե-Կվադրատ Ամպեգա»-ի գործունեությանը և կառավարվող ֆոնդերի կատարողականին։

Ներկայացվել են նաև կենսաթոշակային հաշվիչի նորարարական առանձնահատկությունները, կենսաթոշակային հաշիվների կատարելագործմանն ուղղված քայլերը։

Անդրադարձ է կատարվել կրթական ծրագրերի միջոցով հասարակության ֆինանսական գրագիտության խթանմանը։

Երկուստեք կարևորվել են ընկերության մոտեցումները, որոնք ուղղված են Հայաստանի կապիտալի շուկայի և ֆինանսական էկոհամակարգի հետագա զարգացմանը։

Հիշեցնենք, որ բազմաստիճան կուտակային կենսաթոշակային համակարգի ներդրումը մեկնարկել էր 2014թ. հունվարի 1-ից: 2018 թվականի հուլիսի 1-ից ԿԿՀ-ը պարտադիր է դարձել 1974 թվականի հունվարի 1-ից հետո ծնված ՀՀ բոլոր քաղաքացիների համար (մինչև 1974 թվականի հունվարի 1-ը ծնված քաղաքացիների համար գործում է բաշխիչ կենսաթոշակային համակարգը): 2018 թվականի հուլիսի 1-ից ուժի մեջ է մտել կուտակային կենսաթոշակի պարտադիր բաղադրիչը: Համակարգին կամավոր հիմունքներով մասնակից կարող են դառնալ նաև մինչեւ  1974թ. ծնված քաղաքացիները:

2013 թվին ԿԿՀ-ի  ներդրումից մինչև այսօր ՀՀ ԿԲ-ի կողմից ԿԿՀ-ի շրջանակներում կենսաթոշակային միջոցների կառավարման լիցենզիաներ ստացած կառավարիչների թիվը կազմում է ընդամենը երկուսը՝ "Ցե-Կվադրատ Ամպեգա Ասեթ Մենեջմենթ Արմենիա" (C-Quadrat Ampega) և "Ամունդի-Ակբա Ասեթ Մենեջմենթ" (Amundi-ACBA): Առաջինի բաժնետերերն են ավստրիական C-Quadrat Investment AG ներդրումային ընկերությունը և գերմանական Talanx Asset Management ընկերությունը։ Ակտիվների մեծությամբ (մոտ 150 մլրդ եվրո) Talanx Asset Management GmbH-ն Եվրոպայի խոշորագույն ապահովագրական և ֆինանսական խմբերից մեկն է, որը ներկայացված է 150 երկրներում: Երկրորդի բաժնետերերն են 35 երկրներում ավելի քան 2,2 տրլն եվրոյի չափով ակտիվներ կառավարող ֆրանսիական «Ամունդի» ընկերությունը (51%) և հայկական ԱԿԲԱ Բանկը (49%):

Հայաստանի Կենտրոնական բանկի նախագահի տեղակալ Արմեն Նուրբեկյանի խոսքով ՝ նոյեմբերի 25-ի դրությամբ Հայաստանի պարտադիր կենսաթոշակային ֆոնդերի կողմից կառավարվող ակտիվների ծավալը հասել է մոտ 1 տրլն դրամի: Վերջերս կարգավորիչը փոփոխություններ է առաջարկել "Կուտակային կենսաթոշակների մասին" օրենքում, որոնք թույլ կտան մեղմել կենսաթոշակային հիմնադրամների ներդրումների որոշ սահմանափակումներ եւ կընդլայնեն մասնավոր բիզնեսում (Private Equity) ուղղակիորեն ներդրումներ կատարելու հնարավորությունները: Ակնկալվում է, որ պահպանողական ֆոնդերի համար բաժնետոմսերում ներդրումների մասնաբաժինը կավելանա՝  25%-ից մինչեւ  35%: