Արմինֆո. Հայաստանի արտարժույթի միջբանկային շուկայում դեկտեմբերի 16-20-ը երեք անգամ իրականացվել են դոլարային գործարքներ, և նույնքան՝ ռուբլով գործարքներ, իսկ հինգշաբթի և ուրբաթ օրերին հարթակ բոլորովին դատարկ էր: Եվրոյով գործարքներ արդեն գրեթե երկու ամիս չեն կատարվում: Հաշվետու ժամանակահատվածում դոլարային գործարքների ավելի ցածր ծավալները շաբաթական թրենդը ծավալել են 10 անգամ աճից դեպի 90% անկում, իսկ ռուբլով գործարքների ծանրակշիռ ծավալները թույլ են տվել շաբաթական թրենդը 87,3% անկումից հասցնել 4,5 անգամ աճի։ Դա գրեթե հավասարեցրել է դոլարային և ռուբլով գործարքների շաբաթական ընդհանուր ծավալները։
Դրան զուգահեռ, արտարժույթի ներբանկային շուկայում հաշվետու շաբաթվա ընթացքում (16-20.12.24' 09-13.12.24-ի համեմատ) դոլարի առքի անկումը կտրուկ արագացել է վաճառքի աճի աննկատ դանդաղման պայմաններում, եվրոյի առքի միտումը շրջադարձ է կատարել դեպի անկում' վաճառքի աճի խիստ արագացման դեպքում, իսկ ռուբլով գործարքների դեպքում առքուվաճառքի միտումը երկնիշ աճից շրջադարձ է կատարել դեպի անկում:
Արդյունքում՝ ս.թ. դեկտեմբերի 16-20 - ը դրամը սկսել է թուլանալ ինչպես դոլարի նկատմամբ' 395-ից մինչև 396 դրամ/1դոլար, այնպես էլ ռուբլու նկատմամբ' 3,78 - ից մինչև 3,86 դրամ/1ռուբլի, ընդ որում, շարունակելով ամրապնդվել եվրոյի նկատմամբ' 416-ից մինչև 415 դրամ/1եվրո: Մեկ տարի առաջ ՝ դեկտեմբերի 20 - ին, դրամի փոխարժեքը դոլարի նկատմամբ կազմել է 406,5 դրամ/1դոլար, եվրոյի նկատմամբ՝ 445 դրամ/1եվրո, ռուբլու նկատմամբ ՝ 4,47 դրամ/1ռուբլի, ինչը ներկայիս փոխարժեքների համեմատ վկայում է դրամի տարեկան արժևորման մասին և դոլարի, և եվրոյի, և ռուբլու նկատմամբ։
