Հայաստանի ֆինանսական իշխանություններն իջեցրել են 2024 թվականի ՀՆԱ-ի աճի կանխատեսումը՝ 5.8%- ից մինչեւ 5-5.5%

Արմինֆո. ՀՀ ֆինանսների նախարարությունը հերթական անգամ նվազեցրել է 2024 թվականի ՀՆԱ-ի աճի իր սպասումները՝ 5.8%-ից մինչեւ 5-5.5%: Այդ մասին դեկտեմբերի 25-ին ամփոփիչ մամուլի ասուլիսի ժամանակ հայտարարել է ֆինանսների նախարար Վահե Հովհաննիսյանը։ Մինչդեռ, ընթացիկ տարվա հաստատված բյուջեում ցուցանիշն ամրագրվել է 7 տոկոսի մակարդակում, իսկ սեպտեմբերին կանխատեսումը վերանայվել էր մինչև 5.8 տոկոս։

Նրա խոսքով՝ 2024 թվի վերջին պետական պարտքը կանխատեսվում է ՀՆԱ-ի 49.8%  (5 տրլն 272 մլրդ դրամի մակարդակում, իսկ կառավարության պարտքը սպասվում է 5 տրլն 038.5 մլրդ դրամի չափով (12 մլրդ 647.9 մլն դոլար-խմբ.):

Հիշեցնենք, որ "ՀՀ 2024թ. պետական բյուջեի մասին" ՀՀ օրենքի համաձայն,  ՀՆԱ-ի 7% աճի ապահովման պայմաններում Հայաստանի պետական գանձարանի եկամուտները կկազմեն 2 տրլն 723.6 մլրդ դրամ (ՀՆԱ - ի 25.9% - ը), իսկ ծախսերը՝ 3 տրլն 206.5 մլրդ դրամ (ՀՆԱ-ի 30.5%)։ Հարկային եկամուտները և պետական տուրքը նախատեսված են 2 տրլն 613.6 մլրդ-ի չափով (ՀՆԱ-ի 24.9% - ը): Ընթացիկ ծախսերն արձանագրվել են 2 տրլն 511.2 մլրդ դրամի մակարդակում (ՀՆԱ-ի 23.9%), ոչ ֆինանսական ակտիվների գծով ծախսերը՝ 695,3 մլրդ դրամ (ՀՆԱ-ի 6,6%): Պետբյուջեի պակասուրդը կկազմի 482,9 մլրդ դրամ կամ ՀՆԱ-ի 4,6% - ը։

Սակայն "ՀՀ 2025թ. պետական բյուջեի մասին" օրենքում ֆինանսական իշխանությունները սրբագրել են իրենց ակնկալիքները 2024թ. հիմնական մակրոտնտեսական ցուցանիշների վերաբերյալ։ Այսպես, ընթացիկ տարվա արդյունքներով Հայաստանի պետական գանձարանը, ընթացիկ տարվա ծրագրային ցուցանիշի համեմատ ՀՆԱ-ի 5,8 տոկոս հավելաճի դեպքում, 130 մլրդ դրամի չափով եկամուտ պակաս կունենա, հարկային մուտքերի եւ պետական տուրքի գծով թերհավաքումը կկազմի 157.8 մլրդ դրամ. Պետբյուջեի ծախսերը կկրճատվեն 130.5 մլրդ դրամով։ Ընթացիկ ծախսերը նախատեսվում է կրճատել 74 մլրդ դրամով ։ Ոչ ֆինանսական ակտիվների ծախսերը, ինչպես սպասվում է, կնվազեն 56 մլրդ դրամով՝ մինչեւ 639,3 մլրդ դրամ։ Արդյունքում՝ միակ հաստատունը 482,9 մլրդ դրամի պակասուրդն է։