Արմինֆո. ՀՀ կառավարությունը դեկտեմբերի 27-ին հավանություն է տվել Հայաստանի Հանրապետության և Եվրասիական զարգացման բանկի միջև Կայունացման և զարգացման եվրասիական հիմնադրամի (ԿԶԵՀ) միջոցներից "Քաջարանի թունելի կառուցում" նախագծի ֆինանսավորման համար 200 մլն ԱՄՆ դոլարի չափով ներդրումային վարկի տրամադրման մասին համաձայնագրի թիվ 1 լրացուցիչ համաձայնագրի կնքման առաջարկությանը:
Ինչպես ասվում է փաստաթղթի հիմնավորման մեջ, Հայաստանի Հանրապետության նախագահը 2024թ. դեկտեմբերի 9-ին ստորագրել է «Հայաստանի Հանրապետության և Եվրասիական զարգացման բանկի միջև «Հայաստանի Հանրապետության և Եվրասիական զարգացման բանկի միջև Կայունացման և զարգացման եվրասիական հիմնադրամի միջոցներից «Քաջարանի թունելի շինարարություն» ծրագրի ֆինանսավորման համար ներդրումային վարկի տրամադրման մասին» համաձայնագիրը վավերացնելու մասին» թիվ ՀՕ-467-Ն օրենքը:
«Այնուամենայնիվ, ներկա փուլում Համաձայնագրում փոփոխություն կատարելու անհրաժեշտություն է առաջացել, ինչը պայմանավորված է այն հանգամանքով, որ շինարարության ընթացքում հեղինակային հսկողություն ապահովելու նպատակով Ծրագրի շրջանակներում նախատեսված են խորհրդատվական ծառայություններ, որոնք իրավասու է իրականացնել միայն այն ընկերությունը (այսուհետ՝ Նախագծող), որը մշակել է մանրամասն նախագիծը։ Մինչդեռ Համաձայնագրով նախատեսված չէ խորհրդատուի արտամրցութային ընտրության գնման ընթացակարգը, որը կապահովի Նախագծողի հետ հեղինակային հսկողության պայմանագրի կնքման հնարավորությունը։
Վերոգրյալով Համաձայնագրին կից լրացուցիչ համաձայնագրի նախագծում կատարվել է լրացում ԿԶԵՀ գնումների ընթացակարգերի արտամրցութային ընտրության վերաբերյալ:
Հաշվի առնելով Քաջարանի շուրջ 7 կմ երկարությամբ թունելի կառուցման և մոտեցող ճանապարհների (շուրջ 4 կմ ընդհանուր երկարությամբ) առանցքային նշանակությունը՝ ՀՀ տարածքային կառավարման և ենթակառուցվածքների նախարարությունը նպատակահարմար է համարում Հայաստանի Հանրապետության և Եվրասիական զարգացման բանկի միջև Կայունացման և զարգացման եվրասիական հիմնադրամի միջոցներից «Քաջարանի թունելի շինարարություն» ծրագրի ֆինանսավորման համար ներդրումային վարկի տրամադրման մասին» համաձայնագրին կից թիվ 1 լրացուցիչ համաձայնգրի ստորագրումը», - նշվում է հիմնաավորման մեջ:
