ԵՏՀ նախարար. "Խաղաղության խաչմերուկ" նախաձեռնության շրջանակում նախատեսվում է ավելացնել "Հյուսիս-Հարավ" ՄՏՄ-ի թողունակությունը

Արմինֆո. ՀՀ կառավարության նախաձեռնած "Խաղաղության խաչմերուկ" նախաձեռնության շրջանակում նախատեսվում է բարձրացնել երկաթուղային և ավտոմոբիլային հաղորդակցություններում հարևան երկրների հետ տրանսպորտային կապի հնարավորությունը և ավելացնել "Հյուսիս - Հարավ" միջազգային տրանսպորտային միջանցքի թողունակությունը՝ հանրապետության տարածքով անցնող հատվածում: Այդ մասին "Իզվեստիա"-ի  հարցազրույցում պատմել է Եվրասիական տնտեսական հանձնաժողովի Էներգետիկայի և ենթակառուցվածքի նախարար Արզիբեկ Կոժոշևը: Նրա խոսքով՝ ԵԱՏՄ երկրները մեծ ուշադրություն են դարձնում "Հյուսիս - Հարավ" միջազգային տրանսպորտային միջանցքի զարգացման հարցերին ՝ որպես միության համար, ընդհանուր առմամբ, փոխադրումների զարգացման առաջնահերթ ուղղություններից մեկը: Միջանցքը համարվում է հեռանկարային նախագծերից մեկը, որը կոչված է նոր մակարդակով ապահովելու մեր երկրների տրանսպորտային կապը առանցքային գործընկերների շուկաների հետ։ Նախատեսվում է նաև, որ այն կդառնա հզոր և հուսալի եվրասիական տրանսպորտային ուղի ԵԱՏՄ կայուն տրանսպորտային կարկասի ձևավորման գործում:

"Նոր առևտրային ուղիների որոնումը միշտ եղել է ԵԱՏՄ օրակարգի առաջնահերթություն։ Այսօրվա իրողությունները բեռների հոսքերի շրջադարձն է դեպի Արևելք և Ասիա՝ դեպի գլոբալ Հարավ։ Կարևոր է անել այնպես, որ նոր երթուղիները հնարավորինս հարմարավետ և մատչելի լինեն օգտագործման համար: Այդ պատճառով ավանդական համարվող և մեր երկրների տարածքով անցնող տրանսպորտային միջանցքները նոր ընթերցում են ստացել։ Դա վերաբերում է նաև "Հյուսիս - Հարավ" նախագծին ։ Այն կարևոր է ԵԱՏՄ բոլոր երկրների համար։ Բայց նաև՝ ոչ միայն նրանց համար: Եվրասիական տրանսպորտային միջանցքները, որոնք տեսականորեն միանգամայն կարող են դիտարկվել որպես եվրասիական տրանսպորտային կարկաս, դարձել են առանցքային լոգիստիկ տարրեր, որոնք ԵԱՏՄ երկրները կապում են Մերձավոր և Հեռավոր Արևելքի, Արևելյան Աֆրիկայի և Հարավային Ասիայի հետ: Սա, ընդհանուր առմամբ,  ԵԱՏՄ-ի համար փոխադրումների զարգացման գերակա ուղղություններից մեկն է։ Ըստ էության, այդ պատճառով էլ շարունակվում է աշխատանքը "Հյուսիս - Հարավ" ՄՏՄ հարավային մասի երեք հիմնական երթուղիների զարգացման ուղղությամբ ՝ անդրկասպյան, արևմտյան և արևելյան", - ասել է ԵՏՀ նախարարը ։