Արմինֆո. Հայաստանում բոլոր ոչ հրապարակային հիմնադրամները ենթարկվելու են Կենտրոնական բանկի պահանջներին։ Ազգային ժողովի ֆինանսավարկային եւ բյուջետային հարցերի հանձնաժողովը հունվարի 13 - ի նիստում դրական եզրակացություն է տվել "Ներդրումային ֆոնդերի մասին" օրենքում եւ հարակից օրենքների փաթեթում ՀՀ կառավարության կողմից երկրորդ ընթերցմամբ ներկայացված փոփոխություններին: Ինչպես իր ելույթում նշել է ՀՀ Կենտրոնական բանկի նախագահի տեղակալ Հովհաննես Խաչատրյանը, ներդրումային ֆոնդերի մասին օրենքն ընդունվել է մի քանի տարի առաջ, որտեղ ոչ հրապարակային ֆոնդերին անռչվող հարցերի կարգավորումը շատ մակերեսային է ներկայացվել: Այնուամենայնիվ, նախկինում ընդունված օրենքն իր դրական դերն է ունեցել։ Ներկայումս հանրապետությունում գործում են 56 ակտիվ ոչ հրապարակային ֆոնդեր' ակտիվների 135 մլրդ դրամ ընդհանուր ծավալով: Այդ առնչությամբ դրանց գործունեությունը կանոնակարգելու անհրաժեշտություն է առաջացել։
Նոր փաթեթում առաջարկվում է "Ներդրումային ֆոնդերի մասին" օրենքի դրույթները տարածել նաեւ ոչ հրապարակային ֆոնդերի վրա՝ սահմանելով ֆոնդի հասկացությունը, կարգավիճակը, զուտ ակտիվների արժեքի հաշվարկման, ֆոնդի փայերի տեղաբաշխման եւ մարման կարգը: ԿԲ-ը հնարավորություն կունենա օրենսդրությամբ սահմանված պահանջների խախտման դեպքում իր գործիքները կիրառել ոչ հրապարակային ֆոնդերի և դրանք կառավարող ընկերությունների նկատմամբ: Կենտրոնական բանկն իրավունք կստանա նաև նորմատիվ իրավական ակտերի ընդունման միջոցով լրացուցիչ պահանջներ սահմանել ոչ հրապարակային ֆոնդերի և դրանց կառավարիչների նկատմամբ:
Բացի այդ, փաթեթի ընդունննումից հետո կսահմանվեն բորսայական ֆոնդը (ETF) և դրա առանձնահատկությունները, որոնց բաժնետոմսերի առեւտուրը կիրականացվի ֆոնդային բորսայում։ Դա, ըստ ներկայացված փաստաթղթերի հեղինակների մտահղացման, թույլ կտա ETF-ի բաժնետոմսեր թողարկել Հայաստանի Հանրապետությունում։
