Հայաստանում կբարձրանա թանկարժեք մետաղների շուկայի նկատմամբ վերահսկողության արդյունավետությունը

Արմինֆո. Հայաստանի իշխանությունները ցանկանում են բարձրացնել թանկարժեք մետաղների շուկայի նկատմամբ վերահսկողության արդյունավետությունը։ Ազգային ժողովը հունվարի 20-ի նիստում երկրորդ ընթերցմամբ քննարկում է "Թանկարժեք մետաղների մասին" օրենքում կատարված փոփոխությունները:

Ներկայացնելով փոփոխությունները՝ ՀՀ էկոնոմիկայի նախարար Գևորգ Պապոյանը նշել է, որ իրավական ակտի անհրաժեշտությունը պայմանավորված է գործող օրենքում առկա անհամապատասխանությունների վերացման անհրաժեշտությամբ, ինչպես նաև տեսչական մարմնի կողմից թանկարժեք մետաղներից պատրաստված իրերի մանրածախ առևտրի ոլորտի նկատմամբ առավել արդյունավետ վերահսկողության նպատակով: Մասնավորապես, ինչպես նշել է նախարարը, գործող օրենսդրության որոշ հոդվածներում առկա են հակասություններ, որոնք խոչընդոտում են շուկայի վերահսկողության տեսչական մարմնի աշխատանքը։ Օրինակ, օրենքի 6-րդ հոդվածը պահանջում է, որ թանկարժեք մետաղներից պատրաստված առարկաները ենթարկվեն հարգորոշման, մակնշման, ինչպես նաև ունենան տարբերանշան և անվանում: Սակայն, 8-րդ հոդվածը թվարկում է ընդամենը երեք պահանջ, ինչը խոչընդոտում է վերահսկողության ամբողջական իրականացմանը: Փոփոխությունների ընդունումից հետո նախատեսվում է համապատասխանեցնել գործող օրենքի 6-րդ և 8-րդ հոդվածների պահանջները՝ դրանով իսկ վերացնելով առկա հակասությունները: Անհրաժեշտ կլինի նաև ապահովել ԵԱՏՄ անդամ երկրների միջև թանկարժեք մետաղների հարգորոշման փոխադարձ ճանաչման գործընթացի շարունակականությունը: