Արմինֆո. Հայաստանում բոլոր ոչ հանրային հիմնադրամները ենթարկվելու են Կենտրոնական բանկի պահանջներին։ ՀՀ Ազգային ժողովի հունվարի 21-ի նիստում երկրորդ եւ վերջնական ընթերցմամբ քննարկվում են "Ներդրումային ֆոնդերի մասին" օրենքում եւ հարակից օրենքների փաթեթում կատարված փոփոխությունները:
ՀՀ Կենտրոնական բանկի նախագահի տեղակալ Արմեն Նուրբեկյանի խոսքով, երկրորդ ընթերցման ժամանակ նոր առաջարկներ չեն ստացվել ոչ ԱԺ պատգամավորներից, ոչ էլ հանրապետության կառավարությունից: ԿԲ փոխնախագահը նշել է, որ ներդրումային ֆոնդերի մասին գործող օրենքն ընդունվել է մի քանի տարի առաջ, որտեղ ոչ հանրային ֆոնդերին առնչվող հարցերի կարգավորումը շատ մակերեսային է ներկայացվել: Այնուամենայնիվ, այս օրենքն իր դրական դերն է ունեցել։ Ներկայումս հանրապետությունում գործում են 56 ակտիվ ոչ հանրային ֆոնդեր' 135 մլրդ դրամ ընդհանուր ակտիվների ծավալով: Այդ առնչությամբ անհրաժեշտություն է առաջացել կանոնակարգել դրանց գործունեությունը։
Նոր փաթեթում առաջարկվում է "Ներդրումային ֆոնդերի մասին" օրենքի դրույթները տարածել նաեւ ոչ հանրային ֆոնդերի վրա' ֆոնդի հայեցակարգի, դրա կարգավիճակի, զուտ ակտիվների արժեքի հաշվարկման կարգի, ֆոնդի բաժնետոմսերի տեղաբաշխման և մարման սահմանմամբ: ԿԲ-ը հնարավորություն կստանա օրենսդրությամբ սահմանված պահանջների խախտման դեպքում իր գործիքները կիրառել ոչ հանրային ֆոնդերի և դրանց կառավարող ընկերությունների նկատմամբ: Կենտրոնական բանկն իրավունք կստանա նաև լրացուցիչ պահանջներ սահմանել ոչ հանրային ֆոնդերի և դրանց կառավարիչների նկատմամբ՝ նորմատիվ իրավական ակտերի ընդունման միջոցով:
Փաթեթի ընդունումից հետո կսահմանվեն նաև ֆոնդային բորսայի ֆոնդը (ETF) և դրա առանձնահատկությունները, որոնց բաժնետոմսերը սակարկության կդրվեն ֆոնդային բորսայում: Դա, ըստ ներկայացված փաստաթղթերի հեղինակների, թույլ կտա ETF բաժնետոմսեր թողարկել Հայաստանի Հանրապետությունում։
