Կառավարության շենքի դիմաց բողոքի մասնակիցներ. Հարկային նորամուծությունները վերացնում են ոչ թե ստվերը, այլ՝ ՓՄՁ-ները

Արմինֆո.Հարկային նոր փոփոխությունները պայմաններ են ստեղծում փոքր բիզնեսից մշտական ֆինանսական գանձումների համար, չնայած վարչապետ Նիկոլ Փաշինյանի հավաստիացումներին, թե ՀՀ քաղաքացին չպետք է դառնա "տուգանքի մատերիալ": Նման հայտարարությամբ հանդես են եկել մի խումբ քաղաքացիներ, որոնք այսօր բողոքի ակցիա էին իրականացնում ՀՀ կառավարության շենննքի դիմաց: Հանրապետության հրապարակ էին եկել կրկին ոսկեգործության ոլորտի ներկայացուցիչները: Նրանք դժգոհ են Հարկային օրենսգրքի փոփոխություններից, որոնց համաձայն, շրջանառության հարկը 5 տոկոսից կբարձրանա մինչեւ 10 տոկոս:

Ցուցարարները նշել են, որ նման փոփոխություններն ավելի շատ ուղղված են բիզնեսին մղձավանջի ենթարկելուն ՝ անընդհատ տուգանքներ սահմանելով: "Մենք ունենք ապրանքներով լի խանութ, և այդ նորամուծությունների մեջ ոչ մի խոսք չկա ոչ ռեվիզիայի, ոչ էլ վաճառասեղաններին արդեն առկա ապրանքի արժեքի մասին։ Անձամբ ես, որպես քաղաքացի, կարծում եմ, որ դա արվում է մեկ նպատակով ՝ տուգանել", - հայտարարել է բողոքի մասնակիցներից մեկը։

Այնուհետև նա պարզաբանել է, որ ունի ապրանք, որը ձեռք է բերել դեռևս անցյալ տարի, երբ փաստաթղթի առկայությունը պարտադիր չէր՝ հին օրենքի համաձայն, և ինչ անել այդ ապրանքի հետ՝ նոր օրենքը չի ասում:

Հավաքված գործարարների շրջանում միանգամայն տրամաբանական հարց է առաջանում, թե ինչպես հիմնավորել այդ ապրանքի ծագումը,  հաշվի առնելով դրա մեծ քանակությունը և այն, որ մինչև նոր օրենքի ուժի մեջ մտնելը հնարավոր չի լինի վաճառել այ ։ "Ինչպես են որոշելու, թե որ թվին  է արտադրվել ապրանքը", - հարց են ուղղել ակցիայի մասնակիցները:

Բացի այդ, ցուցարարները նշել են, որ թեև հարկի անվանումը մնացել է նախկինը՝ շրջանառության հարկ, սակայն, իրենց կարծիքով, այն վերածվել է այլ հարկատեսակի, և հիշեցրել են, որ ապրանքը, ըստ էության, արդեն հարկվել է Հայաստան ներմուծելիս:

Նրանք ընդգծել են, որ այդ փոփոխությունների մեջ տեսնում են միայն փոքր ու միջին ձեռնարկատիրությունը վերացնելու ձգտում։ "Ստվերն այլ տեղ պետք է փնտրել։ Պետությունն ունի ստվերի դեմ պայքարի անհրաժեշտ մեխանիզմներ և գործիքներ, թող վերահսկի այդ ամենը՝ հարկերը կրկնակի բարձրացնելու փոխարեն", - վրդովվել են ցուցարարները։

Բողոքի մասնակիցները վստահ են, որ եթե իրենք հիմա լռեն, իշխանությունները կարող են մտածել, որ հասարակությունը համակերպվել է նոր անհաղթահարելի պայմանների հետ: "Նման պայմաններում աշխատելն անհեթեթ է ։ Նրանք ամեն ինչ անում են, որ մարդը թողնի ամեն ինչ և հեռանա այս երկրից ։ Նրանք պետք է հիշեն, որ ծառայում են ժողովրդին։ Մենք նրանց փոխարինում չենք ուզում, նրանք, պարզապես, պետք է մտածեն մեր մասին: Բայց հիմա այնպիսի տպավորություն է, որ դա արվում է հատուկ նրա համար, որ դժգոհության մեծ ալիք բարձրանա", - հավելել են ցուցարարները։

Միաժամանակ, ինչպես պարզաբանել են ցուցարարները, օրենսդրական նոր փոփոխությունները լրացուցիչ ծախսեր են ստեղծում ՝ կապված հաշվապահի ծառայությունների հետ։ "Ոչ ոք չի լսում հայ ժողովրդին, ոչ ոք ոչինչ չի բացատրում և չի հարցնում ։ Մենք կարող ենք երկու ժամ կանգնել այստեղ, բայց ոչ ոք չի իջնի: Գլխաավորը՝ որ իրենց համար լավ լինի", - շարունակել են ակցիայի մասնակիցները։

 Ընդ որում, նրանց խոսքով, իրենց ապրանքի 80%-ն այսօր նույնիսկ չի վաճառվում՝ բնակչության գնողունակության վատթարացման եւ խոշոր առցանց առեւտրային հարթակների առաջացման պատճառով, որոնք բացասաբար են անդրադառնում իրենց բիզնեսի վրա: "Բոլոր օրենքները, որ նրանք ընդունում են, ուղղված են ՓՄՁ-ների ոչնչացմանը", - կրկին ընդգծել են ցուցարարները: