Արմինֆո. Armenian Airlines ավիաընկերությունը փետրվարի 21-ից մեկնարկում է ուղիղ չվերթներ՝ Երևանից դեպի Դելի։ Սա առաջին ուղիղ ավիափոխադրումն է Հայաստանի և Հնդկաստանի միջև։
Ինչպես հաղորդում է ավիաընկերության մամուլի ծառայությունը, թռիչքները կիրականացվեն շաբաթական երկու անգամ հաճախականությամբ՝ երեքշաբթի և ուրբաթ օրերին, հարմարավետ Airbus 321 ինքնաթիռով՝ նախատեսված 220 ուղևորի համար։
Երևան - Դելի թռիչքի տևողությունը՝ 4 ժամ 40 րոպե է, հետադարձը՝ 5 ժամ. 10 րոպե։
Ավիաընկերությունը Երևանով հարմարավետ տրանսֆերային թռիչքներ է ապահովելու նաև Մոսկվայի (Շերեմետևո միջազգային օդանավակայանից) և ՌԴ այլ քաղաքների ուղևորների համար՝ դեպի Դելի։
Ընկերությունում նշել են նաև, որ այս տարի նախատեսվում է մի շարք նոր ուղղությունների գործարկում:
Հիշեցնենք, որ Armenian Airlines-ը հիմնադրվել է 2022 թվականի դեկտեմբերին ։ Ավիաընկերությունն իր առջև նպատակ է դրել զարգացնել միջազգային երթուղիների ցանցը, ինչպես նաև ընդլայնել միացնող չվերթների հարմարավետ մոդելը, որը հիմնված է Երևանի տարածքով թռիչքների գործող ծրագրի վրա:
