Հասարակական տրանսպորտի ուղեվարձի բարձրացումը 0.1% ազդեցություն կունենա գնաճի վրա

Արմինֆո. Հասարակական տրանսպորտի ուղեվարձի 100 դրամից մինչև 150 դրամ բարձրացումը 0,1% ազդեցություն կունենա գնաճի վրա։ Այդ մասին փետրվարի 4-ին կայացած մամուլի ասուլիսի ժամանակ հայտարարել է Հայաստանի Կենտրոնական բանկի նախագահ Մարտին Գալստյանը։

Նա պարզաբանել է, որ սպառողական զամբյուղում հասարակական տրանսպորտի ծառայությունների տեսակարար կշիռը կազմում է ընդամենը 0,4 տոկոս, որից Երեւանին բաժին է ընկնում 0,23 տոկոսը ։ "Եվ եթե դիտարկենք իրավիճակը, որ քաղաքացիները կօգտվեն 150 դրամ սակագնից ՝ առանց տրանսպորտային փաթեթներ գնելու, այսինքն,  խոսքը 50 տոկոս թանկացման մասին է, այդ դեպքում ազդեցությունը սպառողական գների ինդեքսի վրա կլինի 0,1 տոկոս", - ասել է Գալստյանը։

Մինչդեռ, ըստ ՀՀ վիճակագրական կոմիտեի տվյալների, 2024թ. հունվար-դեկտեմբեր ամիսներին տրանսպորտի ոլորտում սակագներն աճել են 5,8%-ով (2023թ.13,2% աճի և 2022թ. 16,3% աճի դիմաց), ավելի քան 3 անգամ բարձրացել են անձնական տրանսպորտի հետ կապված ծառայությունների սակագները, և 18,9%-ով բարձրացել են ավտոապահովագրության սակագները (2023թ. 13,4% անկման և 2022թ. 7,3% աճի դիմաց):

Հիշեցնենք, որ Երևանի քաղաքապետարանի որոշմամբ ՝ ս.թ. փետրվարի 1-ից հասարակական տրանսպորտի մեկանգամյա ուղեվարձը կազմում է 150 դրամ ՝ նախկին 100 դրամի փոխարեն: Դրա հետ մեկտեղ, քաղաքապետարանը մշակել է 30, 90 և 365 օրվա տոմսային փաթեթներ, որոնց ձեռք բերման պայմանների մասին առավել մանրամասն տեղեկատվություն է ներկայացված transport.yerevan.am կայքում: