Ռուսաստանի ԱԳՆ. ԵԱՏՄ-ին և ԵՄ-ին Հայաստանի միաժամանակյա անդամակցությունն անհնար է

Արմինֆո. Ռուսաստանը Հայաստանին տեղեկացրել է, որ Եվրասիական տնտեսական միությանը և Եվրոպական միությանը միաժամանակյա անդամակցությունն անհնար է։ Այդ մասին հայտարարել է ՌԴ փոխարտգործնախարար Միխայիլ Գալուզինը՝ "Իզվեստիա"-ի հետ հարցազրույցում։

"Ինչ վերաբերում է կոնկրետ Եվրամիության հետ Հայաստանի  մերձեցմանը, ապա մենք և հրապարակավ, և մեր հայ բարեկամների հետ երկխոսության ընթացքում հստակ նշել ենք, որ Եվրասիական տնտեսական միությանը և Եվրոպական միությանը միաժամանակյա անդամակցությունը հնարավոր չէ, որովհետև  դրանք մաքսային ստանդարտների, տեխնիկական, սանիտարական և բուսասանիտարական ստանդարտների, ապրանքների մակնշման և սերտիֆիկացման, և, նույնիսկ, մտավոր սեփականության հարցերի վերաբերյալ տարբեր մոտեցումներով երկու անհամատեղելի կարգավորող համակարգեր են։ Դրանք բոլորովին տարբեր համակարգեր են, և դրանցում միաժամանակ գտնվելն ուղղակի անհնար է", - նշել է ռուս դիվանագետը։

Անդրադառնալով Հայաստանի և Եվրամիության միջև տարբեր տեսակի նախագծերի շուրջ բանակցությունների մեկնարկին՝ հօգուտ մերձեցման, և, մասնավորապես, առանց վիզայի ռեժիմի, ապա, այո, նման բանակցություններ սկսվել են։ "Մենք տեսնում ենք, որ Եվրամիությունն այստեղ էլ հավատարիմ է իրեն, քանի որ առանձնապես խոստումներ չտալով և առանց վիզայի հարաբերությունների առումով լուրջ որոշումներ չընդունելով ՝ արդեն Հայաստանից պահանջում է քաղաքական լոյալություն և միանալ հակառուսական պատժամիջոցներին ։ Եվ այս ամենը տեղի է ունենում այն ֆոնին, որ Հայաստանի անդամակցությունը Եվրասիական տնտեսական միությանն զգալի և ծանրակշիռ երկարաժամկետ օգուտներ է բերում նրա համար՝ ԵԱՏՄ հետ առևտրի աճի և ԵԱՏՄ տարածքից դեպի Հայաստան ներդրումների աճի տեսքով", - շարունակել է Գալուզինը։

Այդ համատեքստում նա վկայակոչել է հայկական վիճակագրության վերջին թվերը, ուշադրություն դարձնելով, որ Հայաստանի և ԵԱՏՄ նրա գործընկերների միջև ապրանքաշրջանառության ծավալը կազմում է մոտ 13 մլրդ դոլար և անցյալ տարի այն աճել է 53% - ով, իսկ Եվրամիության հետ առևտրի ծավալը նախորդ տարի հազիվ գերազանցել է 2 մլրդ դոլարը և, ընդ որում, կրճատվել է 24% - ով։

"Այսինքն, նույնիսկ հայկական վիճակագրության այս թվերից է երևում, թե որտեղ են գտնվում Հայաստանի և նրա ժողովրդի ներկայիս տնտեսական բարեկեցության ակունքները, իսկ պարադիգմի կտրուկ փոփոխությունը և անցումը Եվրամիության հարթակ, մեր կարծիքով, անխուսափելիորեն կապված է լինելու և ՀՆԱ-ի անկման, և հայկական բիզնեսին, տնտեսությանը և Հայաստանի հասարակ քաղաքացիների կենսամակարդակին հասցված լուրջ հարվածների հետ։ Հայ քաղաքական գործիչները երբեմն խոսում են այն մասին, որ հայ հասարակության շրջանում տրամադրություններ կան ԵՄ-ին միանալու օգտին։ Հավանաբար, կան նաև նման տրամադրություններ, բայց, ինչպես կարծում ենք, հավասարապես արժանի են նաև Հայաստանի այն քաղաքացիների տրամադրությունները, ովքեր իրենց երկրի ապագան պատկերացնում են եվրասիական ընտանիքում և եվրասիական ինտեգրման շրջանակներում", - ամփոփել է Գալուզինը։

Նշենք, որ ՀՀ կառավարությունը հունվարի 9-ին հավանություն է տվել "Եվրաքվե" քաղաքացիական նախաձեռնության առաջարկած՝ Եվրոպական միությանն անդամակցելու գործընթաց սկսելու մասին օրենքի նախագծին, որն առաջիկայում կքննարկվի Հայաստանի խորհրդարանում։