Աղբահանության թանկացման մասին հայտարարությունից հետո Երևանի քաղաքապետարանը հետագայում մշակել է արտոնյալ փաթեթներ

Արմինֆո. Երևանի քաղաքապետարանը մշակել է աղբահանության ծառայությանն առնչվող  արտոնյալ փաթեթներ: Այդ մասին փետրվարի 11-ին ավագանու նիստում հայտարարել է Երեւանի քաղաքապետ Տիգրան Ավինյանը։ Նա, մասնավորապես, նշել է, որ նախագիծը կներկայացվի ավագանու հաջորդ նիստին:

Նշենք, որ նախորդ տարվա դեկտեմբերի վերջին քաղաքային իշխանությունները հայտարարել էին, որ այսուհետեւ աղբահանության դիմաց վճարի հաշվարկը հիմնվելու է ոչ թե բնակիչների թվի, այլ զբաղեցրած բնակելի անշարժ գույքի մակերեսի վրա:

Հիշեցնենք, որ ըստ գործող կարգի,  Երևանում յուրաքանչյուր բնակչի մեկ շնչին բաժին է ընկնում ամսական 200 դրամ վճար՝ աղբահանության դիմաց: Նորամուծությունից հետո, ինչպես վստահեցրել է Երևանի քաղաքապետարանի եկամուտների հաշվառման և հավաքագրման վարչության պետի պաշտոնակատար Դավիթ Հակոբյանը, բնակարանների բնակիչների համար, միջին հաշվով, աղբահանությունը կթանկանա 80 դրամով, առանձնատների դեպքում՝ 180 դրամով:

Հղում անելով Երևանի քաղաքապետարանի  բազային՝ նա նշել է, որ Երևանի մեկ սենյականոց բնակարաններում, որպես կանոն, բնակվում է 2 մարդ, և աղբահանությունը նրանց համար այդ դեպքում 400 դրամից կբարձրանա մինչև 455 դրամ, երկսենյականոց բնակարանում՝ 3 հոգի, և վճարը 600 դրամից կդառնա 689 դրամ, երեք սենյականոց բնակարաններում բնակիչների համար՝ 900 դրամից՝ մինչև 975 դրամ, չորս սենյականոց բնակարանների բնակիչների համար՝ 1200 դրամից մինչև 1287 դրամ: