Արմինֆո.Ռեզիդենտի քարտ կամ Հայաստանի Հանրապետությունում օրինական բնակությունը հավաստող տեղեկանք ունեցող անձանց համար Հայաստանի ՆԳՆ-ն իրավական նախադրյալներ է ստեղծում ՀՀ-ում նույնականացում անցնելու և Mobile ID ստանալու համար, որը թույլ կտա ստանալ պետական էլեկտրոնային ծառայությունների հասանելիություն:
Ինչպես ասվում է որոշման նախագծում, որը զետեղված է իրավական ակտերի e-draft.am միասնական էլեկտրոնային պորտալում, գործող իրավական նորմերի համաձայն, միայն նույնականացման քարտ ստացած Հայաստանի Հանրապետության քաղաքացիներն իրավունք ունեն դիմելու և ստանալու Mobile ID: Միաժամանակ, պետական էլեկտրոնային ծառայությունների ընդլայնմամբ պայմանավորված, հնարավորություն է ստեղծվել նշված ծառայությունները հասանելի դարձնել Հայաստանի Հանրապետությունում օրինական բնակվող օտարերկրացիների համար:
Համաձայն գործող օրենսդրական նորմերի՝ օտարերկրացին կարող է դիմել ռեզիդենտի կարգավիճակ ստանալու համար և կացության կարգավիճակ ստանալ ինչպես անձամբ, այնպես էլ լիազորված անձի միջոցով: Հայաստանի Հանրապետությունում օրինական գտնվող և բնակվող օտարերկրյա քաղաքացին իրավունք ունի նաև լիազորված անձի միջոցով ստանալ հանրային ծառայությունների համարանիշ:
Միևնույն ժամանակ, պետական էլեկտրոնային ծառայությունների մատուցումը հնարավոր է միայն նույնականացման խիստ միջոցների կիրառմամբ, ուստի օրինագծում օտարերկրացիների համար սահմանված են համապատասխան կանոններ, մասնավորապես, նրանք կարող են դիմել և ստանալ Mobile ID-ն՝ Միգրացիայի և քաղաքացիության ծառայության կողմից օտարերկրացիների հաշվառման համակարգում նույնականացման մասին համապատասխան նշում կատարելուց հետո, որի համար օտարերկրացին պետք է նախապես ներկայանա ՆԳՆ միգրացիայի և քաղաքացիության ծառայություն:
Վերոգրյալի համատեքստում, իրավական միատեսակ կիրառումն ապահովելու նպատակով, նախագծով նախատեսվում է, որ նշված դրույթը տարածվում է նաև այն օտարերկրացիների վրա, ովքեր մինչև սույն կանոնների ուժի մեջ մտնելը ունեցել են ռեզիդենտի կարգավիճակ և այն հաստատող համապատասխան վավեր փաստաթուղթ, ինչպես նաև բնակության օրինականությունը հաստատող վավեր վկայական:
