Արմինֆո. Հայաստանում կխստացվի տեսալսողական ծրագրերի տեխնիկական չափորոշիչների պահպանման նկատմամբ վերահսկողությունը։ ՀՀ Ազգային ժողովը մարտի 5-ի հերթական նիստում երկրորդ և վերջնական ընթերցմամբ փոփոխություններ է կատարել "Տեսալսողական ԶԼՄ-ների մասին" օրենքում:
Ըստ ՀՀ բարձր տեխնոլոգիական արդյունաբերության նախարար Մխիթար Հայրապետյանի՝ նախագծով առաջարկվում է, մասնավորապես, վերանայել կարգավորող մարմնի գործառույթը, որը վերաբերում է տեսալսողական ծրագրերի տեխնիկական չափորոշիչների պահպանման նկատմամբ վերահսկողությանը: Հեռարձակողին տրված թույլտվության կամ լիցենզիայի գործողությունը կասեցնելու կամ դադարեցնելու դեպքում կարգավորող պետական մարմինը երեք օրվա ընթացքում այդ մասին տեղեկացնում է ինչպես մուլտիպլեքսին, այնպես էլ հաղորդումը հեռարձակող ցանցային օպերատորներին, որպեսզի հեռարձակումն անհապաղ դադարեցվի:
Ավելացվել է հանրային մուլտիպլեքսի սլոթի օգտագործման լիցենզավորման մրցույթին մասնակցելու հայտ ներկայացնելու նոր պահանջ. մասնավորապես, ներկայացված հեռարձակման հայտում պետք է նախատեսվի հեռարձակման ծառայությունների գծով ժամկետանց պարտքերի և պարտավորությունների բացակայության պահանջ։
Վերանայվել են լիցենզիայի տրամադրման և գործողության կասեցման, ինչպես նաև դրա տրամադրման պայմանները: Առաջարկվող փոփոխությամբ լիցենզիայի տրամադրման եւ գործողության կասեցման պայման կարող է լինել նաեւ ընդունվող չափանիշներին չհամապատասխանող տեխնիկական միջոցներով հեռարձակողի կամ օպերատորի գործունեությունը, ինչը կարող է տեխնիկական խոչընդոտներ ստեղծել Հայաստանում օրինական գործող ռադիոհաճախականություններ օգտագործող այլ սուբյեկտների գործունեության համար:
Հիմնական զեկուցողի կարծիքով՝ առաջարկվող կանոնները, գործնականում, կվերացնեն թյուրիմացությունները և կապահովեն իրավական որոշակիության սկզբունքը:
