Առեւանգված ավտոտրանսպորտային միջոցների սեփականատերերը կազատվեն գույքահարկի վճարումից

Արմինֆո.Հայաստանում առեւանգված ավտոտրանսպորտային միջոցների սեփականատերերը կազատվեն գույքահարկի վճարումից՝ մինչև դրանք տերերին վերադարձնելը։ Երկրի խորհրդարանը մարտի 5 - ի լիագումար նիստում երկրորդ եւ վերջնական ընթերցմամբ փոփոխություններ է կատարել Հարկային եւ Քրեական դատավարության օրենսգրքերում:

Ներկայացնելով փոփոխությունները՝ ՀՀ ներքին գործերի նախարարի տեղակալ Արմեն Մկրտչյանը նշել է, որ վերջին հինգ տարիների ընթացքում Հայաստանում կատարվել է տրանսպորտային միջոցների հափշտակության շուրջ 100 դեպք: Կան նաև խարդախության դեպքեր, բայց՝ շատ ավելի փոքր քանակությամբ ։ Ներկայացված փաթեթը, ինչպես ընդգծել է Մկրտչյանը, կոչված է լուծելու այդ փոխադրամիջոցների սեփականատերերի խնդիրը՝ գույքահարկի վճարման գծով։ Մասնավորապես, օրինագծերով նախատեսվում է տրանսպորտային միջոցների իրական սեփականատերերին ազատել գույքահարկի վճարումներից՝ մինչև դրանց վերադարձը, և այդ գործողությունը բարդել հանցագործություն կատարած անձի վրա: Ընդ որում, վճարումների հետաձգման ժամկետը սահմանվել է 1 տարի ՝ այն ևս 1 տարով երկարաձգելու հնարավորությամբ, եթե տվյալներ են ձեռք բերվել, որ քրեական դատավարության ընթացքում տրանսպորտային միջոցը շարունակում է գտնվել սեփականատիրոջ տիրապետումից դուրս ։

Տրանսպորտային միջոցների առեւանգման կամ խարդախությամբ հափշտակման հետ կապված գործերի քննության ժամանակահատվածում դրանց պետական գրանցումը կկասեցվի: Պետական գրանցման կասեցման մասին տեղեկատվությունը փոխանցվում է տեղական ինքնակառավարման մարմիններին: Փաթեթն ուժի մեջ կմտնի պաշտոնական հրապարակման պահից 10-րդ օրը: