«Հայկական ավիաուղիներ» ավիաընկերությունը ժամանակավորապես դադարեցնելու է թռիչքները. ընկերությունը պարզաբանել է պատճառները

Արմինֆո. «Հայկական ավիաուղիներ» ավիաընկերությունը ապրիլի 7-ից ժամանակավորապես դադարեցնելու է թռիչքները։ Ինչպես ասվում է ավիաընկերության պաշտոնական հաղորդագրությունում, նման որոշման համար հիմք է հանդիսացել ինքնաթիռային պարկի թարմացումը և նոր օդանավերի ձեռք բերումը։

«Բոլոր այն ուղևորները, որոնք ունեն ամրագրված կամ ձեռքբերված տոմսեր ապրիլի 6-ից հետո, խնդրում ենք դիմել այն կազմակերպությանը, որի միջոցով գնել են տոմսը՝ գումարի ամբողջական հետվերադարձ կատարելու համար։

Եթե ավիատոմսը ձեռք եք բերել «Հայկական ավիաուղիներ»-ի կայքից, ապա խնդրում ենք Ձեր հայտն ուղարկել [email protected] էլեկտրոնային փոստի հասցեին՝ կցելով տոմսը և թողնելով հետադարձ կապի հեռախոսահամար։

Նոր օդանավերի ձեռքբերումը կարևոր է ավիաընկերության զարգացման, նոր ու հետաքրքիր ուղղությունների բացահայտման համար։

Մենք շնորհակալ ենք մեր ուղևորներին վստահության համար։ Առաջիկայում «Հայկական ավիաուղիները» կներկայանա նոր ու հագեցած պարկով, ինչը հնարավորություն կտա ապահովել առավել հարմարավետ թռիչքներ մեր ուղևորների համար։ Կսպասենք ձեզ մեր նոր օդանավերում», - ասվում է ավիաընկերության հաղորդագրությունում:

Նշենք, որ «Հայկական ավիաուղիներ» ավիաընկերությունը հիմնվել է 2022 թվականի դեկտեմբերին։ Ավիաընկերությունն իր առջև նպատակ է դրել զարգացնել միջազգային երթուղիների ցանցը, ինչպես նաև ընդլայնել ծայրակցող չվերթների հարմարավետ մոդելը, որը հիմնված է Երևանով թռիչքների գործող ծրագրի վրա: