Միրզոյան․Հայաստանը մտադիր է Իրանի հետ երկկողմ ապրանքաշրջանառությունը հասցնել մինչեւ 3 մլրդ դոլարի

Արմինֆո. Հայաստանը մտադիր է այսուհետ ևս զարգացնել առևտրատնտեսական հարաբերություններն Իրանի հետ և երկկողմ առևտրաշրջանառությունը հասցնել մինչեւ 3 մլրդ դոլարի։ Այդ մասին հայտարարել է ՀՀ ԱԳ նախարար Արարատ Միրզոյանը՝ Իրանի իր գործընկեր Աբաս Արաղչիի հետ համատեղ մամուլի ասուլիսի ժամանակ։

«Գոհունակությամբ պետք է արձանագրեմ, որ բարեկամ Իրանի հետ Հայաստանի հարաբերությունները շարունակում են զարգանալ կայուն կերպով, ինչը մեր կառավարության տարածաշրջանային քաղաքականության առաջնահերթություններից մեկն է: Պարբերական արդյունավետ շփումներ ու փոխայցեր կան ոչ միայն մեր երկու նախարարությունների, այլ նաև բոլոր ճյուղային գերատեսչությունների միջև: Իրանի հետ հարաբերությունների հարուստ օրակարգը ներառում է կյանքի գրեթե բոլոր բնագավառները՝ քաղաքական, տնտեսական, տրանսպորտային, էներգետիկ, կրթական, գիտական, մշակութային: Ուրախությամբ պետք է արձանագրեմ, որ այս բոլոր ոլորտներում առաջընթաց ենք գրանցել, և վստահ եմ, որ երկկողմ գործակցության խորացումը կկրի շարունակական բնույթ:

Նախարար Արաղչիի հետ քննարկումներում ընդգծել ենք երկու երկրների միջև առկա տնտեսական փոխգործակցության կարևորությունը, որը շոշափելի հաջողություններ է գրանցել հատկապես վերջին տարիներին. կարող ենք արձանագրել, որ 2024 թվականին մեր երկկողմ առևտրաշրջանառության ծավալը գերազանցել է նախորդ առնվազն հինգ տարիների ցուցանիշը, և սա կարևոր արդյունք է: Այսօր մենք շարունակել ենք քննարկումը երկու երկրների միջև առևտրաշրջանառությունը 3 մլդ ԱՄՆ դոլարի հասցնելու հնարավորությունների շուրջ։ Այդ համատեսքտում պետք է նշել, որ երկկողմ առևտրաշրջանառության առկա հնարավորություները լրացվել են նաև ԵԱՏՄ-ի և Իրանի միջև ազատ առևտրի համաձայնագրի կնքմամբ։

Նշեմ, որ Իրանն իր մասնակցությունն ունի Հայաստանի տնտեսական ենթակառուցվածքային ծրագրերի իրականացման գործում, որոնք ոչ միայն տնտեսական, այլև իրականում ռազմավարական նշանակություն ունեն: Քաջարան-Ագարակ 32 կմ ճանապարհային հատվածը, որի շինարարությունը հայկական կողմը վստահել է իրանական ընկերությանը, «Խաղաղության խաչմերուկ» նախագծի կարևոր բաղադրիչներից է։ Այսպիսով, կարող ենք փաստել, որ Իրանը ոչ միայն առաջին պետություններից էր, որը ողջունեց մեր «Խաղաղության խաչմերուկ» նախագիծը, այլև գործնականում ներգրավված է նախագծի կյանքի կոչմանը», - հայտարարել է Միրզոյանը։

Իր հերթին՝ Իրանի ԱԳ նախարարը նշել է երկկողմ հարաբերություններում չօգտագործված ներուժը: "Իրանն ու Հայաստանը պատրաստ են պայմաններ ստեղծել տարանցման և բեռնափոխադրումների համար՝ ինչպես Սև ծովի, այնպես էլ Պարսից ծոցի, Հնդկաստանի, Օմանի ուղղությամբ, նոր կամուրջ կառուցել Արաքս գետի վրա", - ասել է Արաղչին, հավելելով, որ "Խաղաղության խաչմերուկ" նախագծի իրականացումը մեծ հնարավորություններ կստեղծի երկու երկրների միջև հարաբերությունների զարգացման համար:

ՀՀ վիճակագրական կոմիտեի 2024 թվականի հունվար-դեկտեմբեր ամիսների տվյալների համաձայն,  Իրանը Հայաստանի հետ արտաքին առևտրաշրջանառության ծավալով զբաղեցնում է 4-րդ հորիզոնականը՝ 737.4 մլն դոլար՝ տարեկան 6.5% աճով։ Մասնավորապես, Իրանի ուղղությամբ ներմուծումն աճել է 5.2% - ով, իսկ արտահանումը՝ 14.5%-ով, որոնց մեծությունները բացարձակ արտահայտությամբ կազմել են, համապատասխանաբար, 629.2 մլն դոլար և 108.3 մլն դոլար: Իրանի մասնաբաժինը նվազել է ինչպես արտահանման մեջ՝ մինչև 0.8%, այնպես էլ ներմուծման մեջ՝ մինչև 3.7%: