Հայաստանի կադաստրային քարտեզների ճշգրտման նորարարական մեթոդները ներկայացվել են Ավստրալիայում կայացած խորհրդաժողովում

Արմինֆո. 2025 թվականի ապրիլի 6-10-ը Ավստրալիայի Համագործակցության Բրիզբեն քաղաքում անցկացվող Չափագրողների միջազգային ֆեդերացիայի (FIG) աշխատանքային շաբաթվա շրջանակում ՀՀ կադաստրի կոմիտեի ղեկավար Սուրեն Թովմասյանը ներկայացրել է զեկույց՝ «Հայաստանում կադաստրային քարտեզների սխալների ուղղումը երկրատարածական տեխնոլոգիաների կիրառմամբ» խորագրով:

ՀՀ կադաստրի կոմիտեի հաղորդագրության համաձայն, Սուրեն Թովմասյանը մանրամասն անդրադարձել է Հայաստանի Հանրապետությունում 2021 թվականին մշակված իրավական կարգավորումների հիման վրա կադաստրային քարտեզների սխալների հայտնաբերման և ուղղման ուղղությամբ իրականացվող աշխատանքներին, ինչպես նաև կիրառվող նորարարական մեթոդներին։ Հատուկ ուշադրություն է դարձվել երկրատարածական տեխնոլոգիաների, ներառյալ՝ աշխարհագրական տեղեկատվական համակարգերի և հեռազննման նյութերի օգտագործման արդյունքում ձեռք բերված նշանակալի առաջընթացին։

Զեկույցին հաջորդել է բովանդակալից քննարկում, որի ընթացքում միջազգային գիտական հանրության ներկայացուցիչները հետաքրքրություն են ցուցաբերել Հայաստանի փորձի նկատմամբ և առաջադրել են մասնագիտական հարցադրումներ։

Սուրեն Թովմասյանի ներկայացրած մեթոդաբանությունն առանձնանում է կադաստրային քարտեզների սխալների ուղղման համակարգված մոտեցմամբ։

Ներկայացված մեթոդաբանությունը ներառում է երկու հիմնական բաղադրիչ՝ օրենսդրական կարգավորումներ և համապատասխան ժամանակակից տեխնոլոգիաների ինտեգրում։

Հատկանշական է, որ այս մեթոդաբանությունն իրականացվել է 2021 թվականին մշակված նոր իրավական կարգավորումների հիման վրա, որը սահմանում էր կադաստրային քարտեզների ուղղման հստակ կարգ։

Կադաստրի կոմիտեի ղեկավարի զեկույցը տպագրվել է նաև FIG-ի գրախոսվող գիտական ամսագրում, ինչը վկայում է մեթոդաբանության գիտական հիմնավորվածության մասին:

«Միջազգային ասպարեզում Հայաստանի փորձը ներկայացնելը նպաստում է պետության՝ տվյալ ոլորտում ունեցած նվաճումների միջազգային ճանաչմանը և գեոդեզիայի ու չափագրման ոլորտի միջազգային մասնագետների հետ մասնագիտական կապերի ամրապնդմանը», - ասվում է հաղորդագրությունում։