Գալուզին. Ռուսաստանը Հայաստանի շահերն ինչ-որ կերպ ոտնահարելու ծրագրեր չունի եւ չի կարող ունենալ, բայց ԵՄ եւ ԵԱՏՄ միջեւ ընտրություն պետք է կատարվի

Արմինֆո.  Ռուսաստանը Հայաստանի շահերն ինչ-որ կերպ ոտնահարելու ծրագրեր չունի և չի կարող ունենալ։ Այդ մասին "Իզվեստիա"-ի հետ հարցազրույցում հայտարարել է Ռուսաստանի փոխարտգործնախարար Միխայիլ Գալուզինը։

"Խոսքն այն մասին չէ, որ Ռուսաստանը կամ մեկ ուրիշը ցանկանում է Հայաստանին բացառել կամ վնաս հասցնել՝ մեր շատ զարգացած տնտեսական համագործակցության համատեքստում։ Մեր միջեւ ապրանքաշրջանառությունը նախորդ տարվա ընթացքում կազմել է մոտ 12 մլրդ դոլար՝ գրանցելով զգալի աճ։ Հայաստանի շահերն ինչ-որ կերպ ոտնահարելու ծրագրեր մենք չունենք և չենք կարող ունենալ։ Նա մեր դաշնակիցն է, ռազմավարական գործընկերը, որի հետ մեզ կապում է, ինչպես Վրաստանի հետ, դարավոր ընդհանուր պատմությունը, ընդհանուր հաղթանակը Հայրենական մեծ պատերազմում, որի 80-ամյակը, հուսով եմ, համատեղ կնշենք մայիսի 9 - ին", - ասել է դիվանագետը։

Գալուզինի խոսքով՝ միաժամանակյա անդամակցությունը ԵՄ-ին և ԵԱՏՄ-ին օբյեկտիվորեն անհնար է, քանի որ այդ միություններն ունեն տարբեր մաքսասակագնային կարգավորում, դրանք իրենց էությամբ տարբեր տնտեսական բլոկներ են: Ռուսաստանի փոխարտգործնախարարը հավելել է, որ, ըստ այդմ, հայ գործընկերները, հավանաբար, պետք է ինչ-որ փուլում կողմնորոշվեն, թե որ ուղղությամբ են գնում ՝ Եվրամիությանն ինտեգրվելու, թե՞ ԵԱՏՄ գծով եվրասիական ինտեգրմանը մասնակցությունը շարունակելու ուղղությամբ:

"Այդ մասնակցությունն ակնհայտ օգուտներ է տալիս Հայաստանի բնակչությանը։ Եվ դա արտահայտվում է, առաջին հերթին, Հայաստանի ՀՆԱ-ի աճի շատ էական թվերով։ Վերջին տարում դա մոտ 6% է: Մյուս կողմից, ի՞նչ է Եվրամիությունն այս փուլում Հայաստանի և այլ երկրների համար։ Դա պահանջների, չափանիշների մի շարք է՝ անդամակցության մշուշոտ հեռանկարներով։ Եթե Հայաստանը գնա եվրոպական ընտրության ճանապարհով, դա օբյեկտիվորեն կհանգեցնի այն հաստատված տնտեսական հարաբերությունների վերանայման, որոնք այսօր Երեւանն ունի իր գործընկերների հետ ԵԱՏՄ գծով:  

Հավանաբար, դա կլինի բավականին ցավոտ գործընթաց, այդ թվում, ցավոք, Հայաստանի բնակչության համար։ Տրամաբանական է ենթադրել, որ երկրի ղեկավարությունն իր բնակչությանը կբացատրի, թե ինչ կարող է կորցնել, դուրս գալով ԵԱՏՄ-ից, եւ ինչ կարող է իրապես ձեռք բերել Եվրամիությանն անդամակցությունից", - հավելել է նա։

Միևնույն ժամանակ, ռուս դիվանագետը կարծում է, որ դրանք, հիմնականում, վաղանցիկ գաղափարախոսություններ են, այլ ոչ թե իրական տնտեսական համագործակցություն: "Նույնիսկ այսօր Հայաստանի ապրանքաշրջանառությունը Եվրամիության երկրներից յուրաքանչյուրի հետ մի քանի անգամ ավելի ցածր է, քան՝ Ռուսաստանի հետ։ Էլ չենք խոսում այն մասին, որ ԵՄ-ը բացահայտ թշնամական քաղաքականություն է վարում Հայաստանի առանցքային տնտեսական գործընկեր և ռազմավարական դաշնակից Ռուսաստանի նկատմամբ։ Դա Ռուսաստանին ռազմավարական պարտություն հասցնելու և մեր երկիրը թուլացնելու արդեն մոլուցքային, մոլագար ձգտումն է, Ուկրաինայում ճգնաժամի քաղաքական-դիվանագիտական կարգավորմանը, խաղաղության հասնելուն ուղղված ցանկացած գործողության արգելափակումը, Ռուսաստանի և ԱՊՀ, ԵԱՏՄ, ՀԱՊԿ գծով նրա ռազմավարական գործընկերների ու դաշնակիցների միջև հարաբերություններում սեպ խրելու փորձերը։

Պաշտոնական Երևանում, հուսով եմ, տեսնում են այս իրավիճակը և համապատասխան գնահատական տալիս։ Առայժմ Հայաստանը դուրս չի գալիս Եվրասիական տնտեսական միության որևէ կառույցից։ Մենք շատ բարձր ենք գնահատում անցած 2024 թվականին ԵԱՏՄ-ում նրա հաջող նախագահությունը, այնպես որ, մեր համագործակցությունը շարունակվում է։ Երկրի ներկայացուցիչները նաեւ ակտիվորեն մասնակցում են ԱՊՀ մարմինների բոլոր միջոցառումներին, բոլոր փորձագիտական հանդիպումներին", - եզրափակել է Գալուզինը։