Կառավարությունը հավանություն է տվել ֆիզիկական անձանց հայտարարագրերի ներկայացման ժամկետների հետաձգմանը

Արմինֆո. Հայաստանի կառավարությունն ապրիլի 17-ին հավանություն է տվել "Քաղաքացիական պայմանագիր" խմբակցության պատգամավոր, ԱԺ տնտեսական հարցերի հանձնաժողովի փոխնախագահ Բաբկեն Թունյանի օրենսդրական նախաձեռնությանը, որով նախատեսվում է հետաձգել հարկային հայտարարագրերի ներկայացման վերջնաժամկետը:

Մասնավորապես, մայիսի 1-ից մինչեւ նոյեմբերի 1-ը հետաձգվում է այս տարի հայտարարագիր ներկայացնողների (2024 թվականի եկամուտների համար) համընդհանուր հայտարարագրի և եկամուտների ներկայացման ժամկետը։ Նրանք, ովքեր պետք է հաջորդ տարի հայտարարագիր ներկայացնեն (2025 թվականի եկամուտների մասին), կարող են դա անել մարտի 2-ից  մինչեւ նոյեմբերի 1-ը ընկած ժամանակահատվածում: Հաջորդ տարիների համար հայտարարագրի ներկայացման ժամկետը կսահմանվի մարտի 2-ից մինչեւ հուլիսի 1-ը:

Ինչպես ավելի վաղ հայտարարել էր Թունյանը, ժամկետների հետաձգումը պայմանավորված է նույնականացման քարտերին առնչվող խնդիրներով։ Նույնականացման քարտերի ստացման գործընթացի պատճառով հերթեր են գոյացել, իսկ առանց դրանց հնարավոր չէ եկամուտների հայտարարագիր լրացնել։

Հիշեցնենք, որ հանրապետության բոլոր ռեզիդենտ քաղաքացիների եկամուտների համընդհանուր հայտարարագրման համակարգի ներդրումը սկսվել է 2023 թվականից ։ Գործընթացը կազմակերպվում է երեք փուլով, տարեցտարի ավելանալու է այն մարդկանց շրջանակը, որոնք պարտավոր են հայտարարագիր ներկայացնել։ Համակարգի ներդրումը կավարտվի 2025 թվականին։

Առաջին փուլում 2023 թվականի եկամուտների հայտարարագիր պետք է ներկայացնեին այն քաղաքացիները, որոնք 2023 թվականի դեկտեմբերի 31-ի դրությամբ զբաղեցնում են համայնքային կամ պետական պաշտոններ ՝ համաձայն <Հանրային ծառայության մասին>օրենքի ։ Բացի այդ, առաջին փուլում ընդգրկվել են 2023 թվականի դեկտեմբերի 31-ի դրությամբ ՀՀ ռեզիդենտ առևտրային կազմակերպությունների մասնակիցներ (բաժնետերեր, բաժնային սեփականատերեր, անդամներ) հանդիսացող ՀՀ քաղաքացիները, ովքեր 2022 թվականի արդյունքներով հայտարարագրել են 1 մլրդ դրամ և ավելի համախառն եկամուտ, ինչպես նաև այն քաղաքացիները, ովքեր "Փողերի լվացման և ահաբեկչության ֆինանսավորման դեմ պայքարի մասին" ՀՀ օրենքի նախագծով համարվում են իրական շահառու, ինչպես նաև նրանք, ովքեր 2023 թվականին ստացել են 20 մլն դրամ եւ ավելի փոխառություն:

2024 հաշվետու տարվա համար մինչև ս.թ. մայիսի 1-ը եկամտահարկի տարեկան հաշվարկ- հայտարարագիր պարտավոր էին ներկայացնել ինչպես նախորդ հաշվետու տարվա (2023թ.) հայտարարագիր ներկայացրած անձինք, այնպես էլ ՀՀ ռեզիդենտ հանդիսացող ՀՀ քաղաքացիների նոր խմբեր: Մասնավորապես, 2024 թվականի ընթացքում քաղաքացիաիրավական պայմանագրերի շրջանակներում աշխատող համարվող և հարկվող եկամուտ ստացած Հայաստանի Հանրապետության քաղաքացիները: 2025 թվականից հայտարարագրեր պետք է ներկայացնեն երկրի ռեզիդենտ բոլոր այն չափահաս քաղաքացիները, որոնք չեն ընդգրկվել նշված երկու խմբերում։