FlyOne Armenia-ի եւ Shirak Avia-ի համաատեղ հայտարարություն. Կառավարության որոշումը կրում է մի շարք վտանգավոր կողմնակի հետևանքներ, որոնք կարող են լրջորեն խաթարել տեղական ավիափոխադրողների զարգացման հեռանկարները

Արմինֆո. Հայկական FlyOne Armenia եւ Shirak Avia ավիաընկերությունները համատեղ հայտարարություն են տարածել ՀՀ Կառավարության կողմից «Հայաստանի Հանրապետություն օդային ճանապարհով իրականացվող ուղևորափոխադրումների զարգացմանն ուղղված աջակցության ծրագիրը հաստատելու մասին» որոշման ընդունման վերաբերյալ:

«Մենք՝ մեկից ավելի ուղղություն սպասարկող գործող տեղական ավիափոխադրողներս, ցանկանում ենք արտահայտել մեր խոր մտահոգությունը՝ կապված ՀՀ Կառավարության կողմից ս․թ․ ապրիլի 23-ին ընդունված «Հայաստանի Հանրապետություն օդային ճանապարհով իրականացվող ուղևորափոխադրումների զարգացմանն ուղղված աջակցության ծրագիրը հաստատելու մասին» որոշման վերաբերյալ։

Հարկ ենք համարում նշել, որ այն չի համաձայնեցվել գործող ավիափոխադրողների հետ և չի բխում Հայաստանում ավիացիայի ոլորտի զարգացման շահերի տրամաբանությունից։

Մեր խորին համոզմամբ՝ նման ծրագիրը, որի հայտարարված նպատակը զբոսաշրջության խթանումն է, ներկայիս ձևով կրում է մի շարք վտանգավոր կողմնակի հետևանքներ, որոնք կարող են լրջորեն խաթարել տեղական ավիափոխադրողների զարգացման հեռանկարները և է՛լ ավելի խորացնել առանց այն էլ առկա անհավասար մրցակցության պայմաններն օտարերկրյա ավիափոխադրողների հետ՝ հաշվի առնելով, որ ՀՀ ավիացիոն ոլորտը գտնվում է ԵՄ և մի շարք այլ երկրների (Իսրայել, Արաբական Միացյալ Էմիրություններ և այլն), այսպես կոչված, «սև ցուցակում»։

Մտահոգիչ է, որ ՀՀ Կառավարության նիստի ընթացքում հնչել են տեղեկություններ, որոնք տպավորություն են ստեղծել, թե նախագիծը ընդունելի է ՀՀ-ում գործող տեղական ավիափոխադրողների համար, ինչը չի համապատասխանում իրականությանը։ Ավելին, պետական պատկան մարմիններին թե գրավոր, թե բանավոր կերպով, տեղեկացվել է այս որոշման նկատմամբ տեղական ավիափոխադրողնորի բացասական դիրքորոշման մասին, ինչը հաշվի չի առնվել նախագծի հեղինակների կողմից։

Կարևորելով ՀՀ ազգային շահերի առաջնահերթությունը՝ կոչ ենք անում սահմանել տեղական ավիափոխադրողների օրինական շահերի պաշտպանության գործուն մեխանիզմներ», - ասվում է ավիաընկերությունների համատեղ հայտարարությունում։

Նշենք, որ ապրիլի 23-ին կառավարությունը որոշում կայացրեց ֆինանսապես խթանել նախկինում չսպասարկվող նոր ուղղություններով չվերթներ իրականացնող ավիափոխադրողներին:

Ինչպես նշվել է փաստաթղթի հիմնավորման մեջ, նոր ուղղություններ են համարվում Հայաստանի Հանրապետությունից դուրս գտնվող այն բնակավայրերը( տվյալ քաղաքը սպասարկող բոլոր միջազգային օդանավակայաններով), որտեղ տվյալ աջակցության ծրագրի շրջանակներում շահառու ավիաընկերությունների առաջին չվերթի մեկնարկին նախորդող 12 ամիսների ընթացքում ցանկացած ավիաընկերության կողմից իրականացված չվերթների քանակը չի գերազանցել 14-ը միաժամանակ ԻԱՏԱ - ի ամառային (մարտի վերջին կիրակիից մինչև հոկտեմբերի վերջին շաբաթ օրը) և 10-ի ձմեռային (հոկտեմբերի վերջին կիրակիից մինչև մարտի վերջին շաբաթ օրը) ժամանակահատվածում:

Ծրագրի շահառու կարող են դառնալ ավիափոխադրողները, որոնք տեղակայված են Հայաստանի օդանավակայաններում, շաբաթական առնվազն մեկ անգամ իրականացնում են չվերթներ (ներառյալ ֆորս-մաժորների պատճառով չեղյալ հայտարարվածները), իրականացնում են առնվազն մեկ կանոնավոր չվերթ դեպի Գյումրի, ինչպես նաև ունեն առնվազն երկու ինքնաթիռ ՝ սեփականության իրավունքով կամ լիզինգի պայմանագրով:

Նշենք, որ FlyOne Armenia-ն (www.flyone.am)  Հայաստանի առաջատար ավիափոխադրողն է։ Հիմնադրվել է 2021 թվականին։ Ավիացիոն պարկը բաղկացած է Airbus A320 և Airbus A319 ինքնաթիռներից ։ Այն համապատասխանում է օդային տրանսպորտի միջազգային ասոցիացիայի (IATA) և EASA-ի անվտանգության բոլոր չափորոշիչներին:

Shirak Avia ՍՊԸ-ն Հայաստանի Հանրապետությունում գրանցվել է 2019 թվականին: 2021 թվականի հունվարին ավիաընկերությունն ստացել էՀՀ քաղաքացիական ավիացիայի կոմիտեի հավաստագիր, որը թույլ է տաալիս շահագործել քաղաքացիական օդանավեր։ 2021 թվականի հոկտեմբերին ստացել է կանոնավոր առևտրային ավիափոխադրումների կատարման հավաստագիր, որը թույլ է տալիս ավիաընկերությանը կատարել կանոնավոր ավիաչվերթներ հետևյալ ուղղություններով ՝ "Զվարթնոց" օդանավակայանից (Երևան)՝ Երևան - Մոսկվա - Երևան, Երևան - Կրասնոդար - Երևան, Երևան-Դոնի Ռոստով-Երևան, Երևան-Սոչի-Երևան, Երևան-Սամարա-Երևան, Երևան-Սանկտ Պետերբուրգ - Երևան;  "Շիրակ" օդանավակայանից (Գյումրի)՝ Գյումրի-Մոսկվա-Գյումրի, Գյումրի - Կրասնոդար-Գյումրի, Գյումրի-Դոնի Ռոստով-Գյումրի, Երևան-Գյումրի-Սոչի - Գյումրի, Գյումրի-Սամարա-Գյումրի և Գյումրի-Սանկտ Պետերբուրգ - Գյումրի: