Կառավարությունը գները թանկացրեց 5%-ով. "Մանթաշյանց" գործարարների միության նախագահ

Արմինֆո. Կառավարությունը գները թանկացրեց 5%-ով: Նման գնահատականով հանդես է եկել "Մանթաշյանց" գործարարների միության համահիմնադիր և նախագահ Վահրամ Միրաքյանը:

«Կառավարությունը/պետությունը որևէ ոլորտի հարկերը բարձրացնում է» ձևակերպումը սխալ արտահայտություն է, երևույթի էությունը փոխանցելու համար պետք է կիրառել «կառավարությունը գները բարձրացնում է» ձևակերպումը:

Որովհետև հարկերի բարձրացման համար միշտ էլ վճարում է հասարակությունը, քանի որ բարձրացված հարկերին համապատասխան բիզեսն իր գները բարձրացնում է:

Օրինակ, հիմա մեր ռեստորանային ոլորտի գները բարձրանում են, քանի որ ոլորտի հարկերն են բարձրանում:

Էնպես որ, երևույթները կոչեք իրենց անուններով՝ ոչ թե «կառավարությունը հարկերը բարձրացրեց 5%-ով», այլ «կառավարությունը գները թանկացրեց 5%-ով»», - գրել է Վահրամ Միրաքյանը՝ «Ֆեյսբուքի» իր էջում:

Հիշեցնենք, որ շրջանառության հարկ (փոխարինում է ԱԱՀ-ին և շահութահարկին) վճարում են այն տնտեսվարող սուբյեկտները, որոնց տարեկան շրջանառությունը չի գերազանցում 115 մլն դրամը (2020թ.հունվարի 1-ից Հայաստանը վերադարձել է մինչև 115 մլն դրամ չհարկվող տարեկան շրջանառությանը)։ 2024 թվականի հունիսին ընդունվել են հարկային օրենսգրքի փոփոխությունները, որոնք ուժի մեջ են մտել այս տարվա սկզբից, ինչը ենթադրում է շրջանառության հարկի դրույքաչափի գրեթե կրկնակի ավելացում՝ փաստաթղթավորված ծախսերի հաշվին վճարման ենթակա հարկի նվազեցման հնարավորություն ընձեռելով։ Մասնավորապես, հանրային սննդի ներկայացուցիչները նախկինում աշխատել են շրջանառության 6% հարկով՝ փաստաթղթավորված ծախսերի 3% հարկային նվազեցման հնարավորությամբ, բայց շրջանառության 4%-ից ոչ պակաս: Սակայն վերանայման արդյունքում սահմանվել է 12% շրջանառության հարկ՝ փաստաթղթավորված ծախսերի 9% հարկային նվազեցման հնարավորությամբ, բայց ոչ պակաս, քան շրջանառության 3.5%-ը։ Այս դեպքում, ինչպես նշել են Ֆինանսների նախարարությունում, արդյունավետ հարկը 4,3 տոկոսից կավելանա մինչեւ 6,6 տոկոս՝ պետական գանձարանին ապահովելով 4,9 մլրդ դրամի լրացուցիչ հարկեր։