Արմինֆո. Չգրանցված անշարժ գույքի հարցով ընդհուպ զբաղվում է Կադաստրի կոմիտեն։ Այդ մասին մայիսի 7-ին ԱԺ-ում կառավարության ժամի ընթացքում հայտարարել է ՀՀ վարչապետ Նիկոլ Փաշինյանը՝ պատասխանելով ԱԺ "Քաղաքացիական պայմանագիր" խմբակցության պատգամավոր Սերգեյ Բագրատյանի հարցին։
Պատգամավորը, մասնավորապես, բարձրացրել է Արագածոտնի մարզում ավելի քան մեկդարյա պատմություն ունեցող մեծ թվով տների առկայության հարցը, որոնք, սակայն գրանցված չեն: Այդ տների բնակիչները գույքահարկ չեն վճարում, գրանցում չունեն, թեև արդեն մի քանի սերունդ ապրում են այնտեղ։
Փաշինյանն այդ առնչությամբ նշել է, որ մեծ խնդիր է ինչպես հողամասերի պարամետրերի հստակեցումը, այնպես էլ ինքնաշեն կառույցներին առնչվող հարցը: Վարչապետն ընդգծել է, որ Հայաստանում կառուցված տների մեծ մասը կառուցվել է առանց նախագծային փաստաթղթերի առկայության։ Այս փաստը, ինչպես նշել է վարչապետը, ինչ-որ չափով կարելի է կապել "իրական Հայաստանի" գաղափարի հետ, ըստ որի, ամբողջ երկիրը կառուցվել է առանց որևէ նախագծային փաստաթղթերի առկայության։ Մինչդեռ, անհրաժեշտ է ունենալ պետություն կառուցելու հայեցակարգ, որը պետք է տեղի ունենա սահմանված ընթացակարգերին համապատասխան։
