Կառավարությունը հավանություն է տվել "Մայլեռ" ԱՏԳ շահագործմանը

Արմինֆո. ՀՀ կառավարությունը մայիսի 8-ին հավանություն է տվել Արագածոտնի մարզի Ապարանի շրջանի Եղիպատրուշ համայնքում «Մայլեռ» ազատ տնտեսական գոտու (ԱՏԳ) գործունեության մեկնարկին:

Ինչպես ասվում է փաստաթղթի հիմնաավորման մեջ, հիմք ընդունելով «Ազատ տնտեսական գոտիների» մասին Հայաստանի Հանրապետության օրենքի (այսուհետ` Օրենք)  5-րդ հոդվածը, «Մայլեռ ԱՏԳ» ՍՊԸ- կողմից մասնավոր նախաձեռնությամբ Հայաստանի Հանրապետության Արագածոտնի մարզի Ապարան համայնքի Եղիպատրուշ բնակավայրում ազատ տնտեսական գոտի ստեղծելու, այդ գոտու Կազմակերպիչ ճանաչվելու համար ներկայացված հայտը, մասնավոր նախաձեռնությամբ ազատ տնտեսական գոտի ստեղծելու համար հայտը գնահատող հանձնաժողովի եզրակացությունը` ՀՀ կառավարության 2024 թվականի օգոստոսի 15-ի N 1302-Ա որոշմամբ ստեղծվել է «Մայլեռ» ազատ տնտեսական գոտին:

«Այն նպատակ ունի նպաստել ՀՀ-ում զբոսաշրջության բազմազանության ու զարգացման ապահովմանը, ինչպես նաև առողջ ապրելակերպի հաստատմանը՝ կառուցելով տարածաշրջանի մակարդակով բարձր ստանդարտներին համապատասխան լեռնադահուկային հանգստավայր, ինչը կնպաստի երկրի զբոսաշրջային գրավչության բարձրացմանը և երկրի/մարզի սոցիալ-տնտեսական կայուն զարգացմանը։

Կազմակերպիչը իրականացնում է խոշորածավալ ներդրումներ ԱՏԳ տարածքում համապատասխան ենթակառուցվածքների, առաջին հերթին ճոպանուղու և սահուղիների ձևավորման ուղղությամբ։

Կազմակերպչի հիմնական կապիտալ ներդրումներն իրականացվում են ճոպանուղու, սահուղիների, արհեստական ձնագոյացման համակարգի, սահադաշտի, հյուրանոցների, ռեստորանի, ժամանցային այլ կենտրոնների, ինչպես նաև ԱՏԳ ներքին կոմունիկացիաների և ենթակառուցվածքների կառուցման համար: Իրականացվել և շարունակվում են իրականացվել ենթակառուցվածքային ներդրումներ։

Որոշման 7-րդ կետով սահմանված է հետևյալը. «ԱՏԳ-ի գործունեության գործարկման վերջնաժամկետը սահմանել 1 տարի` սույն որոշման 6-րդ կետով սահմանված պայմանագրի համաձայն` այն կազմակերպելով «Ազատ տնտեսական գոտիների մասին» Հայաստանի Հանրապետության օրենքով սահմանված կարգով:»։

Վերոնշյալ օրենքի դրույթներին համապատասխան՝ կազմակերպչի կողմից ներկայացվել է գրություն՝ ազատ տնտեսական գոտու գործարկման (մեկնարկի) պայմանները կատարած լինելու մասին՝ խնդրելով հնարավորինս սեղմ ժամկետում կազմակերպել ԱՏԳ մեկնարկի փաստաթղթային ձևակերպումը։

Արդյունքում տեղի է ունեցել Ազատ տնտեսական գոտիների հարցերով միջգերատեսչական հանձնաժողովի նիստ, որի ընթացքում քննարկվել են կազմակերպչի կողմից ներկայացված փաստաթղթերը, և որոշվել է կազմակերպել Հանձնաժողովի անդամների այց «Մայլեռ» ազատ տնտեսական գոտի՝ տեղում պայմաններին ծանոթանալու նպատակով։

Սույն թվականի հունվարի 9-ին տեղի է ունեցել հանձնաժողովի արտագնա նիստ ազատ տնտեսական գոտի, որի ընթացքում Հանձնաժողովի անդամները շրջայց են կատարել գոտու տարածքում, որտեղ իրականացվելու է տնտեսական գործունեություն, ծանոթացել արդեն իսկ կառուցված ենթակառուցվածքներին, ինչպես նաև այն հատվածներին, որտեղ ծրագրի հաջորդ փուլերում իրականացվելու են շինարարական աշխատանքներ։ Անդրադառնալով տեխնիկական պահանջներին՝ պարզ է դարձել, որ «Մայլեռ ԱՏԳ» կազմակերպչի կողմից արդեն իսկ ապահովվել են գոտու մեկնարկի համար նախատեսված պահանջները՝ բացառությամբ անխափան գազմատակարարման։

«ՄԱՅԼԵՌ ԱՏԳ» ՍՊ ընկերության կողմից նշվեց, որ ներկայումս հանգստավայրում առկա օբյեկտները բնականոն գործում են էներգամատակարարմամբ, և ազատ տնտեսական գոտու տարածքում բնականոն գործունեություն ապահովելու համար ներկա փուլում գազամատակարարում անհրաժեշտ չէ։ Հանձնաժողովը, ելնելով «Մայլեռ ԱՏԳ»-ի գործառնական տեսակից, ներկա փուլում գազամատակարարման անհրաժեշտության բացակայությունից և վերջինիս ոչ հրատապ լինելու հանգամանքից, առաջարկել է հնարավորություն տալ ազատ տնտեսական գոտուն գործարկվել առանց գազամատակարարման։

Արդյունքում որոշվել է՝ առաջարկել Էկոնոմիկայի նախարարությանը մշակել ՀՀ կառավարության 2024 թվականի օգոստոսի 15-ի N 1302-Ա որոշման մեջ փոփոխություն կատարելու մասին նախագիծ՝ ՀՀ կառավարության 2024 թվականի օգոստոսի 15-ի N 1302-Ա որոշման N 2 հավելվածից հանելով գազամատակարարմանը վերաբերող պարտադիր պահանջը։

Կարգավորման առարկան, ակնկալվող արդյունքը. Հայաստանի Հանրապետության Արագածոտնի մարզում ազատ տնտեսական գոտու ստեղծմամբ ակնկալվում է խթանել զբոսաշրջության զարգացումը, նոր աշխատատեղերի ստեղծումը, նպաստել ներդրումների ներգրավումը։

Կապը ռազմավարական փաստաթղթերի հետ. Հայաստանի վերափոխման ռազմավարություն 2050, Կառավարության 2021-2026թթ. ծրագիր, ոլորտային և/կամ այլ ռազմավարություններ.

Նախագիծը բխում է ՀՀ կառավարության 2021-2026 թթ. ծրագրի «2. ՏՆՏԵՍՈՒԹՅՈՒՆ» կետից։ Արդյունաբերության երկարաժամկետ մրցունակության տեսանկյունից Կառավարությունը քայլեր է ձեռնարկելու ինչպես տեղական, այնպես էլ միջազգային շուկաներում տարատեսակ տեղական արտադրանքների ներկայացվածության, արտահանման շուկաների դիվերսիֆիկացման և արտահանման խթանման ապահովման ու զարգացման ուղղությամբ:

Նախագծի մշակման գործընթացում ներգրավված ինստիտուտները և անձինք. Նախագիծը մշակվել է Հայաստանի Հանրապետության էկոնոմիկայի նախարարության կողմից:

Լրացուցիչ ֆինանսական միջոցների անհրաժեշտության վերաբերյալ.Նախագծի ընդունմամբ լրացուցիչ ֆինանսական միջոցների ներգրավման անհրաժեշտություն առկա չէ:

Պետական բյուջեի եկամուտներում և ծախսերում սպասվելիք փոփոխությունների վերաբերյալ.Նախագծի ընդունմամբ Հայաստանի Հանրապետության պետական բյուջեում եկամուտների և ծախսերի ավելացում կամ նվազեցում չի նախատեսվում», - ասվում է փաստաթղթում։