Արմինֆո.Ֆինանսական խարդախների զոհերը մայիսի 13-ին կրկին հավաքվել են ՀՀ Կենտրոնական բանկի շենքի մոտ ՝ գլխավոր բանկի ղեկավարությունից պահանջելով վարկային պարտավորությունները չեղարկելու և հափշտակված գումարները վերականգնելու որոշում:
Ակցիայի ընթացքում հասարակական ակտիվիստ Մհեր Ղարագյոզյանը հայտարարել է, որ տուժածները պահանջում են սառեցնել քաղաքացիների անհասկանալի կեերպով առաջացած վարկային պարտավորությունները: Նա նշել է, որ սահմանադրական իրավունքների համաձայն, ՀՀ քաղաքացիներն իրավունք ունեն պահանջել վերականգնել իրենց հասցված վնասը և իրենց անձնական հաշիվներից գողացված գումարները: "Չունենալով որեւէ վարկային պարտավորություն՝ քաղաքացիները առեւտրային բանկերում հսկայական գումարներ են կորցրել", - նշել է Ղարագյոզյանը ՝ որպես օրինակ բերելով մեկ "մութ" գործարքի պատմություն: "Ցուցարարներից մեկի հաշվեհամարին եղել է 20 մլն դրամ գումար, որը եղել է բնակարանի ձեռք բերման գրավական։ Եթե տվյալ անձն իր անձնագրով դիմեր բանկ՝ այդ գումարն իրեն վերադարձնելու խնդրանքով, ապա նա կստանար իրավաչափ մերժում, քանի որ այն գրավադրված էր: Հետագայում այդ գումարն անհասկանալի կերպով անհետացել է քաղաքացու հաշվից",- ընդգծել է Ղարեգյոզյանը, նշելով, որ դեռեւս պարզ չէ նաեւ այն հարցը, թե ինչպես կարող էին գրավադրված միջոցներն, ընդհանրապես, ինչ-որ տեղ անհետանալ։ "Այս ողջ պատմությունը չի տեղավորվում օրինականության և իրավակարգի տրամաբանության մեջ, այն, նույնիսկ, աբսուրդի սահմաններից դուրս է", - ասել է ակտիվիստը:
Մատնանշելով համապատասխան կառույցների անգործությունը՝ Ղարագյոզյանը նշել է, որ այդ ամենում ակնհայտ են կոռուպցիոն դրսևորումները, ուստի ակցիայի մասնակիցները մտադիր են գնալ հակակոռուպցիոն կոմիտե:
Նշենք, որ մայիսի 6-ին կայացած մամուլի ասուլիսում ՀՀ Կենտրոնական բանկի նախագահ Մարտին Գալստյանը հաղորդել էր, որ առևտրային բանկերի հետ քննարկումների արդյունքում վերջիններս սկսել են սառեցնել խարդախների կողմից քաղաքացիների անունով ձևակերպված վարկերը: Մասնավորապես, խոսքը այն վարկերի մասին է, որոնց մասով արդեն հետաքննություն է ընթանում խարդախության հատկանիշներով։
ԿԲ-ը, իր հերթին, մտադիր է դիտարկել անձնական տվյալների հափշտակության բոլոր դեպքերը (ֆիշինգ) և դրա հետ կապված ֆինանսական հանցագործություններ ՝ լինի դա միջոցների գողություն, թե ուրիշի անունով վարկերի ձևակերպում: "Ամբողջ ֆինանսական համակարգի մասշտաբով նման խարդախ գործարքների ծավալը մեծ չէ ՝ ֆիզիկական անձանց վարկերի ընդհանուր ծավալի մոտ 0,1% - ը ։ Այնուամենայնիվ, տուժած քաղաքացիների համար հետևանքները կարող են լուրջ լինել, ուստի յուրաքանչյուր դեպք պահանջում է առանձին ուսումնասիրություն:
Հանրապետությունում գործող 17 բանկերից Կենտրոնական բանկը ներկայումս հատկապես մանրակրկիտ վերլուծում է դրանցից 3-4-ի գործունեությունը: Եթե բանկերի անվտանգության համակարգերը բավականաչափ հուսալի չլինեն, դրանց նկատմամբ պահանջները կխստացվեն։ Սակայն այն դեպքերում, երբ տվյալների արտահոսքը տեղի է ունենում հենց քաղաքացիների մեղքով, Կենտրոնական բանկը դժվար թե կարողանա ազդել իրավիճակի վրա", - նշել էր Մարտին Գալստյանը:
